٤ بيوت ضيافة خريفية بجو رومانسي

عبالكن مشوار رومانسي مع الشريك بعيد عن العالم والعجقة؟ ما بتحلى الكنكنة والرومانسية إلا بالخريف، كرمال هيك خلونا نخبركن عن مطارح مكنكنة للحب والغرام. مشوا معنا على ٤ بيوت ضيافة خريفية بجو رومانسي ومكنكن.

1. كايم، ميروبا

في أحلى من انو تقضوا ليالي تشرين بقلب الغابة؟ كايم عبارة عن بيت ضيافة بحضن الطبيعة، بيتميز بالموديل المودرن والقعدة المفتوحة على الغابة بميروبا.

بعالمكن الخاص من الرواق والغرام، بتلاقوا عند كايم أحلى المناظر الجبلية، بانيو بيطل على الغابة، مسبح مخبى عن العالم، وجو مكنكن على الآخر.

الرقم: 494 649 81

2. The Cave Resort، القموعة

تخايلوا حالكن مع الشريك بقلب كوخ خشب فوق الجبل، بعيد عن العالم ومليان كنكنة. منتجع الكهف بيستقبلكن على قعدة رومانسية بالقموعة بتحسسكن كأنكن على حفة العالم. مكان بتتفرجوا منو على أجمل المناظر الجبلية، بتنسحروا بغروب الشمس بين الغيوم، وبتروقوا راسكن على أطيب ترويقة الصبحيات بحضن الطبيعة.

الرقم: 103 411 70

3. The Dome، كفردبيان

حضروا حالكن لأجمل تجربة رومانسية بالطبيعة بقلب بيت قبة خشب. جاكوزي دافي، قعدة بنص الغابة، فيو مفتوحة على الشجر، جلسة رواق بعيدة عن العالم، وجو دفى وكنكنة وأكتر ناطركن عند ذا دوم بكفردبيان.

الرقم: 330 331 70

4. Calina Joie، حالات جبيل

عم تخططوا لقعدة رومانسية مع الشريك؟ هالبيت الضيافة الساحر بيتميز بإطلالة على البحر وكمان جو دافي للخريف. بتلاقوا بانيو بغرفة النوم، إطلالة على البحر، وجو غرامي على الآخر.

مكان بحسسّكن كأنكن بشهر عسل أد ما رومانسي!

الرقم: 233 122 71

وانتو خبرونا بالتعليقات، مين بتعزموا على هل بيوت ضيافة خريفية؟

شوفوا كمان، ٢٥ بيت خشبي لأحلى قعدة خريفية بالطبيعة