خبرية بتجنن: فوز دوما بجايزة أفضل الضيع السياحية بالعالم!

وأخيراً فقنا على خبرية حلوة اليوم الصبح، ضيعتنا الحلوة دوما طلعت من أفضل الضيع السياحية بالعالم!

أعلن رئيس بلدية دوما أسد عيسى، حصول ضيعة دوما على جائزة أفضل الضيع السياحية بالعالم ضمن المسابقة السنوية لي أجرتها منظمة السياحة العالمية (UNWTO)، وتم الإعلان الرسمي عن الفوز بمنطقة سمرقند بأوزباكستان.

من بين 54 ضيعة من مختلف البلدان اللي إختاروها لتكون على لايحة أفضل القرى السياحية بالعالم، توجت دوما على عرش السياحة بلبنان بدون منازع! وهالجايزة بتاخد بعين الإعتبار معايير مختلفة متل الحفاظ على المناطق الطبيعية، الإهتمام بالقطاع الريفي، التنوع الثقافي، القيم المحلية، والأطباق التقليدية.

منتوجه بالتهاني لأهالي دوما ولكل اللبنانيي على هل إنجاز المميز!

هلق لنخبركن شوي عن هل ضيعة لكل مين ما بيعرفها أو مش زايرها بعد. دوما بلدة سياحية أثرية ساكنة بجرود البترون وبقلوب كل مين بزورها، بتشبه لوحة فنية مرسومة بريشة حمرا. معروفة بزراعة الزيتون والعرايش والتين والتفاح والكرز والنجاص وبجمالها الطبيعي وبحجرها القديم وقرميدها الأحمر وبأكلها الطيب وسوقها العتيق.

نحنا كتير فخورين بكل ضيعة بلبنان وبكل شبر من هل أرض والله يحمي هل بلد ولي في.

ألف مبروك!

شوفوا كمان، من أرشيف الزمن الجميل، ١٦ صورة نادرة لجورجينا رزق.