٥ بلدات لازم تزوروها هل خريف بلبنان

رح نعرفكن على بعض من أجمل الضيع والبلدات يلي ممكن تزوروها هل خريف بلبنان يلي رح تستمتعوا بجمالها لما تشوفوها.

١. صوفر، عاليه

صوفر بتتحول بفصل الخريف لتصير قطعة فنية مليانة ورق أصفر وبتتغطى فيها الفيلات والبيوت التقليدية المهجورة. اكتشفوا أوتيل صوفر غراند الأثري وقصر دونا ماريا الأثري وتمشوا على كورنيش الضيعة مطرح ما رح تشوفوا الورق الأصفر على الأرض وتشعروا بدفا الخريف. ولتعرفوا شو فيكن تعملوا بعد بصوفر، شوفوا المقال هون.

المطاعم اللي ممكن تجربوها صوفر:

مطعم الثلوج
الرقم: 442 292 05

برغر هاوس
الرقم: 501 263 05

٢. بينو، عكار

بينو من الضيع المنسية بالشمال بس هي فعلاً من أجمل الضيع لي ممكن تزوروها. خاصةً بهيك طقس لأن بتكون مكللة بالورق الأصفر. بهالضيعة يلي معروفة بتاريخها العريق ومناظرها الخلابة وبيوتها لي كلا قرميد، فيكن تتمشوا بساحتها وتعيشوا أجواء رومانسية حد بحيرتها الساحرة.

المطاعم اللي ممكن تجربوها ببينو:

مطعم الصياد
الرقم: 828 146 70

مطعم هيكل
الرقم: 650 329 03

٣. فالوغا، بعبدا

فالوغا من أجمل وأهم الضيع بجبل لبنان. بتتميز بتاريخها الكبير وآثارها ومناظرها الطبيعية الرائعة وبيوتها التراثية وبالإضافة لوجود المياه العذبة. أحلى منظر ممكن تشوفوا بفصل الخريف هني البحيرات الإصطناعية وبرك المي وأكيد فيكن تسرحوا بنظركن لبعيد. هالضيعة الرائعة بتخليكن تحسو بالسكينة والهدوء.

المطاعم اللي ممكن تجربوها بالفالوغا:

مطعم وأوتيل رامي
الرقم: 937 215 03

مطعم مياسا
الرقم:751 847 71

٤. عيون أرغش، بعلبك

من أجمل الضيع لي ممكن تزوروها بفصل الخريف، الشجر الأصفر مغطى الأرض وكلا جنينات وطبيعة ساحرة بتستحلوا تتمشوا فيها وتعيشوا لحظات خريفية رومانسية. بتشتهر بطبيعتها الخلابة وطقسها المميز وأكيد رح تستمتعوا ببحيرتها الساحرة وتكتشفوا كل زواريب المنطقة.

المطاعم اللي ممكن تجربوها بعيون أرغش:

مطعم العيون
الرقم: 945 548 71

فوق الغيم
الرقم: 999 477 70

٥.عميق، البقاع

المنطقة غنية بالخضار والأراضي الزراعية وتعتبر أكبر محمية مائية بلبنان، فيكن تقضوا فيها نهار كامل، تكزدروا بقلب مسارات المشي وتتفرجوا على الورق الأصفر حول البحيرة وتتأملوا الطبيعة والطيور النادرة.

المطاعم اللي ممكن تجربوها بعميق:

طاولة عميق
الرقم: 481 004 03

من الضيعة
الرقم: 025 954 03

شوفوا كمان، ٤ متاحف ضروري تزوروها ببيروت مع حبيبكن.