بين التراب و زيتون الجنوب في ألف حكاية!

لبنان موطن لأقدم شجر الزيتون بالعالم. شجر الزيتون أصلو من المنطقة هون وبتلاقوا شجر زيتون بلبنان عمرو ميّات السنين. بيحمل أهمية تاريخية كبيرة بتربطنا بأجدادنا اللي زرعوها والأرض اللي كبرت عليها. 

حكاية الزيتونة بالجنوب بترجع لعصور:

حسب مشروع بعل، وهو مبادرة بتدعم إنتاج زيت الزيتون بلبنان، بيعود تاريخ زراعة الزيتون لسنة 1600 ق.م. ووقتها كانت مدينة صور الفينيقية محطة تجارية لبيع وشرا الزيتون لمختلف الحضارات القديمة على البحر الأبيض المتوسط.  

الزيتون اللبناني معروف إنو غني كتير وعندو جودة عالية. تخطت خبريتو قصة أرض وشجرة، وصار بيحمل رمزية عظيمة لأسلافنا وأجدادنا، وبيربط المنطقة كلها ببعضها وتحديداً لبنان وفلسطين، وبعدها بتحمل شجرة زيتون أهمية كبيرة لليوم. بتذكر ريهام الكوسة، صحفية رويترز انو “الزيتون بيغطي أكتر من 20% من أراضي الزراعية بلبنان وبيقدم دخل لأكتر من 110,000 مزارع ومنتج، وبيمثل 7% من إجمالي الناتج المحلي للزراعة”.

زيتون جنوب لبنان أفضل زيتون بالعالم

وبمشاركة العلامة التجارية اللبنانية للزيتون “دارميس“، إعتلى الزيت اللبناني عرش العالمية. وبكل فخر، هالعلامة التجارية بتحوّش الزيتون من قلب ضيعة جنوبية إسمها دير ميماس، فيها أجود أنواع شجر الزيتون وبتنتج زيت غني. ووقتها دارميس ربحت جايزة أفضل زيت زيتون بالعالم لسنة ال 2023.  

شجر الزيتون بالجنوب إتغنوا في الشعرا

إعتمد الفلاحيين اللبنانية والفلسطينية على الزيت كمصدر للدخل والإنتاج، وحبّن لشجر الزيتون جمعن ببعض رغم الحدود. وبعد النكبة بال 1948 والاجتياح الإسرائيلي لجنوب لبنان، صار شجر الزيتون بيجسّد صورة المقاومة والحب للوطن، وبعبر عن علاقة متجذرة وحميمة مع الأرض. 

وهيك منختم المقال بكلمات الشاعر الفلسطيني محمود درويش:

“لو يذكر الزيتون غارسهُ لصار الزيت دمعا!” 

خبرونا، حبيتوا حكاية شجر زيتون الجنوب؟

شوفوا كمان، جنوبنا الحلو، أجمل ٢٠ صورة من جنوب لبنان