مشوار حلو على بعبدات: ١٠ شغلات فيكن تعملوها

اليوم مشوارنا بياخدنا على ضيعة بعبدات الأثرية بالمتن الشمالي، ضيعة مغمورة بشجر الصنوبر وريحة الجبل، ومعروفة بشخصيات سياسية وفنية متل الرئيس إميل لحود والمخرجة نادين لبكي. تعتبر بعبدات مصيف حلو بالشوبات ومقصد مميز بالخريف بسبب الطبيعة الحلوة والطقس الجبلي والغابات الخضرة. قررنا نطلع بالسيارة ونتجه على هيدي المنطقة الخلابة بالمتن ونكتشفها سوا. شوفوا معنا كيف فيكن تقضوا نهار حلو ببعبدات.

ضيعة بعبدات بتتميز بالتراث الغني المحافظ عليه لليوم والطبيعة الجبلية الخلابة، شو فيكن تعملوا بالمنطقة؟

1. تبرموا بشوارع وحارات الضيعة الأثرية

شوارع قديمة مكللة بالصنوبر والورد، والخضار المعربش على الحيطان.

2. تزوروا دكان الضيعة وتتعرفوا على عمو جميل غانم

هالدكان الزغير عمرو سنين وسنين. بتشوفوا من تفاصيلو جمال أيام زمان ومن أحاديث عمو جميل اللي صار عمرو فوق التسعين سنة محبة أهل الضيعة.

3. تميلوا عند حلويات أزرق و تدوقوا أطايب الضيعة

محل حلويات محلي وزغير بطعمات أصيلة، مشهور بمخبوزات البريوش الطيبة والبوظة شغل إيد ومية بالمية طبيعية!

4. تتفرجوا على البيوت التراثية بالضيعة

حتى الحجر بيحكي بحارات بعبدات، بيخبركن عن حكايات عن التراث اللبناني القديم.

ضيعة بتتميز بأجمل البيوت الجبلية، الصخر القديم، الطبيعة الحلوة، القناطر العالية…

5. تزوروا بلوطة الأب ليونار ملكي ومعصرة عنب بيت الملكي

هالشجرة المعمّرة كتير شهيرة بالضيعة، وبتلاقوها بحديقة يسوع المخلّص مع معصرة عنب لعيلة الملكي. فيها مناظر طبيعية بتريح النفسية وجو روحاني حلو.

6. تكتشفوا غابات الصنوبر بالمنطقة

بتلاقوا دروب مشي بين ريحة خشب الصنوبر ناطرتكن تكتشوفها.

وفيكن تخيموا بالغابة لطلوع الضو مع أصحابكن أو الشريك، بيطلع مشروع خريفي كتير مهضوم!

برمتوا بعبدات وطبيعتها، طيب هلق وين فيكن تاكلوا؟

7. ميلوا عند Chunky Monkey مع ولادكن أو أصحابكن

هالمطعم عندو قعدة مهضومة، بيقدم برغر وبيتزا بتشهي وبيبدع فيهن. بتلاقوا حلويات طيبة وحتى برغر ع شوكولا! عندو board games ونشاطات حلوة ومكنكنة.

الرقم: 228 251 70

8. عيشوا تجربة رومانسية عند مطعم قرطبة بعبدات

واحد من أجمل المطاعم الرومانسية وجوهرة ببعبدات، عندن قعدة شتوية خيالية على ضو الشموع وصوت البيانو. أما قعدة التراس روعة بالخريف، بتطل على شجر الصنوبر وغروب الشمس مع أكل شرقي وكاس نبيد. في أحلى من هيك؟

الرقم: 705 614 71

خلص النهار وحابين تقضوا الليلة بالمنطقة، وين فيكن تناموا؟

9. جربوا Colibri Hotel الشهير بالمنطقة

هالأوتيل بيقدم بوفيهات وأكل طيب، قعدة دافية وكمان قعدة بالهوا الطلق بين الصنوبرات. عندن غرف بجو مريح ولطيف!

الرقم: 402 820 24

10. عيشوا أحلى تجربة منتجع عند The Silk Valley

هالمنتجع المميز بعيد عند بعبدات بس 10 دقايق، وفيكن تعيشوا فيه تجارب حلوة: الحمام التركي، المساج، قعدة بالطبيعة، مسبح بيطل على أحلى المناظر، عشا رومانسي، أكل طيب، بيوت ضيافة جبلية مع بلكون من فوق الوادي، وقعدات تراس بتاخد العقل.

الرقم: 984 344 03 – 409 633 03

خبرونا بالتعليقات، حبيتوا المشوار على بعبدات؟

شوفوا كمان، مشوار على دوما: ١٣ شغلة حلوة فيكن تعملوها