بتعرفوا إنو داليدا عملت غنية للبنان ما حدا بيعرفها؟

بتعرفوا إنو الفنانة الشهيرة داليدا حبت لبنان لدرجة إنو عملتلو غنية؟ بس للأسف هالغنية ما أخدت حقها أبداً على الرغم من انتشارها من بعد رحيل الفنانة يلي حملت إرث فني عظيم.

خلال سنة 1986 وبالفترة يلي كان فيها لبنان رايق نوعاً ما على الرغم من أحداث الحرب الأهلية الأليمة، سجلت داليدا غنية قدمتها للبنان المنكوب من الحرب ولشعبو على أمل إنو تخلص الحرب وتهدى الأوضاع.

بتقول الغنية “بعد الحرب والنار، من بعد ها اللي صار، عاد الصفا لبنان، عاد الوفا لبنان، شمس وقمر، لبنان، لبنان…”

زارت الفنانة داليدا لبنان بالتمانينات وقدمت حفلات فنية أسطورية وعرفوا الموزعين بوقتها إنو داليدا كتير عبالها تغني للبنان فهيك قرر الشاعر عبد الحافظ شمص يكتبلها غنية وتصدرت داليدا من بعد تسجيلها غلاف مجلة الشبكة لتعلن هل عمل المفاجأة للجمهور اللبناني والعالمي.

بس يا فرحة ما تمت… دغري رجعت قويت الحرب والإشتباكات بلبنان والكل نسي الغنية وشو هيي وقطعت مرور الكرام، وما قدرت هالغنية تنتشر وتاخد حقها ولا تحققت أمنية داليدا بالسلام وحتى التلفزيونات اللبنانيي رفضت تبث الغنية لأسباب سياسية وأمنية.

لكنّ وبعد سنين من العذاب والقهر والموت خلصت الحرب ورجع قدر الجمهور اللبناني يسمع الغنية المفاجأة المنسية بصوت داليدا هيي وعم تغنيلو باللبناني لكن بغصة كبيرة لأن كان تأخر الوقت أصلاً وماتت داليدا.

شو رأيكن بهالغنية؟

شوفوا كمان، من أرشيف الزمن الجميل، ١٤ صورة نادرة للصبوحة!