٥ محلات بيعملوا كعكة عصرونية بلبنان

لما يكون الموضوع خصو بالمعجنات والترويقة، أول شي بيخطر عبالنا هوي الكعك (أكيد من بعد المناقيش). لكل مين بحب الكعكة العصرونية سواء كانت بس مع جبنة ورشة زعتر أو حتى على طعمات مميزة متل البيتزا والفاهيتا، هيدا المقال الكن.

خلينا نتعرف على ٥ محلات بحضروا أطيب كعكة عصرونية!

١. كعك البيك

كعكة البيك معروف بطيبة أكلو ولقمة الكعك الطيبة وإذا عبالكن تجربوا الطعمات والنكهات المميزة بالكعك عندو ما إلكن غير كعكة العكاوي والفاهيتا وكعكة الجبنة والجامبون، ضروري تزوروا هالمحل!

الفرع الأول: سد البوشرية
الرقم: 484 584 81

الفرع التاني: الدكوانة
الرقم: 590 220 81

٢. كعك ستيشن Kaak Station، الحمرا

عندن اختراعات كعك على أفا مين يشيل، يعني بيعملوا كعك على بيتزا، كعكة على ييبيروني وخضرا وجبنة وقصص ولا ألذ متل الكعكة على لبنة قراص وكعكة على شكل قلوب ونجوم. كمان بيعملوا ساندويشات بخبز الكعك شي كتير طيب، وبرغر ولا أطيب. الحكي مش متل الشوفة!

الرقم: 488 879 71

٣. كعكة، الكاسليك

هالمحل بقلب الكاسليك بيتفنن بالكعك العصروني، عندو كعكة بيبيروني بيتزا ضروري تجربوها على الغدا، أو حتى كمان كعك الفور تشيز يلي بيجي محشي أربع أنواع جبنة بتدوب بالتم، بس لازم تدوقوا كمان كعكة الكفتا مع الجبنة لكل محبي الجبنة الدايبة والطيبة وعلى التحلاية نصيحة جربوا كعكة النوتيلا والموز والحلاوة.

الرقم: 036 111 81

٤. كعكة الخال، طرابلس

الخال بقدم كعكة طرابلسية غير شكل وبيعمل الكعكة على الفحم فبتطلع طعمتها شي فخامة، بتجي محشية بالجبنة بتدوب بالتم! عندن كمان مختلف الطعمات المرغوبة متل النوتيلا وكعكة البيتزا بحبش والعكاوي مع تشيبس واختراعات كتيرة.

الرقم: 930 049 71

٥. كعكة ومنقوشة، البوشرية

بحضر كعكة ومنقوشة كعكات على مختلف الطعمات. الديكور العتيق سبب أساسي لتزوروا هالمحل لي فيكن تستأنسوا في كل يوم من بكير لعشية وتطلبوا طعمتكن المفضلة متل الزعتر والسجق مع الجبنة أو الكشك مع فنجان قهوة على العصرونية أو الصبحية وحتى الغدا.

الرقم: 080 870 01

شوفوا كمان، هيك أسعار شاورما اللحمة عند أشهر المحلات بلبنان!