أهضم مطعم لبناني رجع فتح بوابو بنص بيروت!

بتتذكروا مطعم ورد الشام؟ هالمطعم يلي كان فاتح بالزمانات وسكر لسنين وكلنا كنا نحبوا؟! رجع فتح من جديد وهالمرة بنص بيروت وتحديداً بأويتل إديدين باي Eden Bay وعلى البحر دغري.

ورد الشام إشتهر بأكلو الطيب وقعدتو المهضومة والجو يلي بحسسكن إنكن قاعدين ببيوت الشام العتيقة عنجد!

بحلتو الجديدة قاعد دغري على البحر وعندو قعدة تراس ساحرة الجمال بتشوفوا منا أجمل منظر لمغيب الشمس بس يكون الطقس حلو.

أما القعدة جوا بتشبه قعدة بيوت الشام العتيقة مع بركة مي بالنص وشجرات زغار.

شو يلي بميز هل مطعم؟ عندن محل بيعملوا في شاورما قدامكن، بتاكلوا لقمة سخنة وكريمة كتير. طلبوا من الشيف صحن شاورما لحمة معرم!

مش بس هيك عندن كمان مخبز لتاكلوا منو خبزكن سخن ومنقل المشاوي بيوصل عطاولتكن بشق النفس.

كل شي عندن طيب من البابوج للطربوش ومقدم بطريقة بتفتح النفس.

أصناف الحلو العربي بعد الغدا رح تشعركن بالدفا وأكيد أطيب شي عندن طبق ورد الشام…. مش ع الفاضي إسم المطعم ورد الشام! ومش بس هيك النمورة بالقشطة وهريسة ورد الشام بالفستق بشقوا القلب.

^{via: carine rammal}

رح يكون نهاركن غير شكل، مع البركة والشاي، والقهوة حد البحر الصبح بكير!

العنوان: الرملة البيضا، لانكاستر إيدن باي
الرقم: 535 352 76

شوفوا كمان، ١٧ طبق حلو عربي لازم تجربوا من هالمحلات بلبنان!