مشوار على أجمل بيوت الضيافة بإهدن للشتوية

الليالي الشمالية الباردة عندها سحرها الخاص بمدينة إهدن. إهدن عروسة الشمال ومقصد لكل محبي التلج والطيبعة والسياحة بلبنان، بتشموا فيها ريحة الجبل ونفس الشمال. بما انو خبرناكن عن المطاعم اللي لازم تزوروها بإهدن، خلونا ناخدكن على 5 بيوت الضيافة بإهدن للشتوية. 

1. Ehd’inn BnB

بيت من الحجر عمرو أكتر من 100 سنة، بياخدكن على بيوت الجبل والقعدة الأصيلة. هالبيت الضيافة محافظ على تراثو وجمالو، وبيتميز بالقعدة البيتوتية اللي بيطلع عبالكن تكنكنوا فيه للصبح. 

الرقم: 646 429 03

2. UŽÍT Cabins

عبالكن تقضوا كم ليلة بقلب الغابة؟ إمسكوا إيد حبيبكن وروحوا عند هالكابين بنص الطبيعة الإهدنية. رح تحسوا حالكن بعاد عن العالم، مغمورين بالشجر، وهلق لما تتلج الدني، المنظر والجو بيطلعوا بياخدوا العقل. 

الرقم: 564 214 81 

3. بيت كرز إهدن

بيت كرز إهدن واحد من أجمل بيوت الضيافة التراثية اللي على الدقة اللبنانية. المميز بهالبيت انو بقلب شوارع إهدن لتحسوا بنبض الحياة بالشمال وتشوفوا الناس الطيبة. 

عندو ديكور تراثي واستثنائي بنفس الوقت، مشغول عليه بأزغر التفاصيل ليحسسكن بدفى البيت وجمال لبنان. 

الرقم: 155 660 76 

4. Maison Heritage

هالمطرح عبارة عن بيت ضيافة بياخدكن على جمال ونوستالجيا أيام زمان. 

قعدتو البيتوتية بتذكركن ببيت التيتا بالجبل وبحسسكن بالدفى من القلب! بتحطوا ركوة القهوة على الصوبا، وبتتونسوا بالقعدة الشتوية.

الرقم: 603 350 76 

5. The North Pod

ذا نورث بود عبارة عن بيت قبة مهضوم بموقع مميز بحضن الغابة، والحلو انو مغطى بالتلوج بعز الشتوية! 

عندو جو رومانسي ورايق ليعيشكن جو حالم مع الشريك!

الرقم: 001 506 81

خبرونا، حبيتوا شو إخترنالكن من بيوت الضيافة بإهدن للشتوية؟

بتحبوا إهدن وكل شي فيها؟ تعرفوا أكتر عن هالمنطقة الشمالية المحبوبة بقسمنا هون.