ضيعة زغيرة منسية بالبترون: وصلت إسم لبنان للعالم!

رغم كل التطور بقيت ضيعة زغيرة منسية عم تعمتد عل صناعة عمرها من عمر لبنان وأكتر بكتير. مش بس هيك هالضيعة هيي عبارة عن الملجأ الأمين لكل حدا ضايق خلقو أو عبالوا يبعد عن التلوث والضجة والهم لأن هواها النقي بيشفي وبصحح كل الأمراض.

اشتهرت هالضيعة بصناعة الفخار على الإيد بالطرق التقليدية لي مستوحاية من أيام الفينقية وعلى الرغم من ظهور الأواني المنزلية الجديدة بقيت الصناعة محط أنظار هالبلدة ووصلتها من لبنان للعالم كلو.

بعد ما عرفتوا عن أي ضيعة عم نحكي؟ عم نحكي عن أجمل ضيعة بالبترون: عم نحكي عن بلدة آسيا البترونية أو آصيا متل ما بقولولا ولاد الضيعة!

ضيعة زغيرة منسية بس حلوة كتير وبتحمل بطياتها قصة شعب عشق الفخار وكرس حياتو لإلو.

هالضيعة بتشتهر كمان بوجود عدد كبير من الأثارات الفينيقية متل النواويس والمطاحن ومعاصر الزيتون العتيقة… بتحسوا حالكن بعدكن عايشين بفينيقيا وعم تتنفسوا هوا جدودنا.

إسمها سرياني وبيعني الشفا وفعلاً إسم عمسمى لأن مجرد ما تجوا على هل ضيعة بتحسوا براحة نفسية ما بتنوصف، بتحسوا نفسيتكن رتاحت عالآخر.

بالزمان كان كل بيت يعمل فخار ويعيش من هيدي شغلة بس اليوم للأسف هيدي صناعة شبه انقرضت من لبنان بس بقيت آصيا محافظة على التراث وعلى هيدي صناعة لي ما بتلاقوها غير بكم محل بالعالم.

مش بس هيك، هالضيعة كمان طوروا صناعة الفخار وزادوا عليها قصص كتير جديدة ما كانت موجودة من قديم متل المقالي والصاج والباربكيو وقصص ما بتلاقوها برا.

بآسيا كمان بيعملوا أكلة خاصة فيهن ولي هيي “قرص البيض” مخبوز منيح وبشهي وأكيد مش دايقينو قبل وما بتلاقوا بولا أي محل تاني!

لي بميز آصيا إنو فيها تراب فخاري منو بينعمل الفخار لي بيوصل للعالم كلو ولي هيي أقدم نوعية فخار وجدت على الأرض. آصيا فيها أقدم نوعية فخار موجودة بالعالم ولي كانت تستعمل بالزمان للطبخ والحياة اليومية. الفخار لي بتعملوا هالضيعة بيحمل نار قوية لوقت طويل كتير وكل شي لأنو فخار حقيقي وع الدقة القديمة!

يعني فخار آصيا مش موجود منو بولا محل بالعالم غير بضيعة آصيا!

غير هيك، بيوت الضيعة حجر قرميد أحمر وعمرها ميات السنين وبتزيد على جمال الضيعة جمال.

وبس تتمشوا ببقلب الضيعة بتلاقوا دير مار آصيا الأثري حلو كتير وبريح، كان عايش في راهب بالزمانات يساعد كل المرضى وبقولوا الضيعة حملت إسم هالكنيسة.

أكيد صار لازم تعملوا مشوار على هالضيعة الحلوة وتعيشوا كل هل عادات الحلوة وترجعوا بالزمن لورا وتشموا ريحة الفخار لي بتريح الأعصاب وبتنسي هموم الدني.

فيكن تعيشوا هل اختبار وتتغدوا عند فخار حنا لي بحضرلكن غدا بالفخار متل إيام زمان…. مغامرة غريبة رح تخليكن ترجعوا بالزمن ميات السنين لورا!

ودخل ترابك يا آصيا!

شوفوا كمان، ضيعة من أجمل الضيع بلبنان ما حدا سامع فيها: شوفوا قصتها!