المشطاح بجريش…خبز الجنوبيّة وتراث بحد ذاتو

 كل منطقة بلبنان عندها خبزها التقليدي ولقمتها الخاصة. واليوم رح نطلع ع الجنوب ونخبركن عن أكلة تراثية مش الكل بيعرفها أو مجربها: المشطاح بجريش. 

 المشاطيح بجريش، أو ما يعرف بالضيع بال “بعابيق بالجريش” خبز الجنوبيين وجزء من تراث جبل عامل من أكتر من ٤٠٠ سنة. وخبز المشطاح التقليدي معروف بكل أنحاء لبنان! بس اللي بميزو بالجنوب انو معمول من قمح الجريش يعني القمح البلدي المجروش أو المطحون ع الخشن مع السمسم وحبة البركة. ووصفتو آخدينا عن جدودنا وبتلاقوا وين ما كان بأفران الجنوب. 

والمشطاح حتى بيختلف بين الضيعة والتانية بجبل عامل. وحسب ضيعتي “عبا” والضيع المجاورة متل أنصار و الدوير و جبشيت منعملوا أساس لمنقوشة الزعتر. يعني فيكن تجربوا “البعبيقة” مع الزعتر البلدي، الجبنة، الكشك، البندورة والبصل، وكتار منا بيعملوا بالبيت ع الفرنية. وحتى في ناس بتحبوا خبز ع الناشف مع ترويقة لبنة وجبنة وبيض وشاي. 

و مشطاح الجريش كان إلو أهميته بالسفر لأنو بياخد أسابيع ليفسد من دون براد حتى. فكان عبارة عن زوادة صحية وطيبة للمسافرين برات الضيعة. 

والمؤرخ شارلز الحايك بيخبرنا أكتر بواحد من فيديوهاتو على صفحتو “Heritage And Roots” عن المشطاح بجريش من قلب “فرن الحجة سهجونة” الموجود بضيعة النميرية الجنوبية: 

خبرونا، رح بتجربوا المشطاح بجريش؟ وشو في بعد أكلات جنوبية بتحبوها؟ 

شوفوا كمان، معنى أسامي ٢٣ من الضيع الحدودية بجنوب لبنان