تعرفوا ع بيت عليا للفن، نذر حب فنان لزوجته

قصتنا اليوم مولودة بضيعة عين زحلتا الشوفيّة، عن بيت لبناني قديم شهد على قصة حب أجمل من قصة روميو وجوليت. وبس لو تعرف عين زحلتا كيف سحرت قلب ست بيروتية من بين أحيائها القديمة، ومن قلب بيت قديم، شبابيكه زرق وقرميده أحمر، ليتحول هالمطرح  ويتسمّى “بيت عليا للفن” (Residence Alia). 

بيت عليا للفن: نذر للحب ومدخل للفن اللبناني المعاصر

هالحب الكبير تجسد ببيت لبناني قديم بلشت قصتو مع الفنان اللبناني فادي مغبغب والفنانة و المصمّمة اللبنانيّة عليا مزنر. وبتقول الحكاية انو هالبيت واحد من بيوت السيد فادي، وكان عبارة عن هدية ونذر لزوجته عليا كتعبير عن حبه إلها. ولأنها قصة حب انجمعت بمجال الفن، تسمى هالبيت بإسم “بيت عليا للفن”، وبتلاقوا فيه لوحات وتحف فنية إستثنائية.  

بيحتوي بيت عليا للفن على لوحات الفنان فادي والفنانة عليا، مستوحاة من أسلوب الفن المعاصر والتراث والطبيعة اللبنانية. كما بيتضمن “Zaarura Edition” وهو أول دار نشر لفن النقش أو ما يعرف بال Etching  بلبنان، بيعمل ورش فنية ويعتبر جوهرة للفنانين اللبنانية. 

هالقصة اللطيفة شاركتها الكاتبة سارة العسكر على حسابها، وبالفيديو بتاخدكن جولة بقلب بيت عليا للفن: 

 ومن بعد زيارتها للبيت وحديثها مع السيد الفادي مغبغب، بيخبرها أديه السيدة عليا بتحب الضيعة: 

“أنا نيالي لأنو مرتي بتحب الضيعة، مش كل ستات بيروت بيحبو الضيعة، أغلبيتهم ما بيحبو الطبيعة، بدن يعملوا شوبينق، بدن يسهروا، بدن يشوفوا العالم. أنا من حظي مرتي بتحب الأَرِزْ والفواكة والخضرة ياللي بنزرعها، بتحب الحياة الطبيعية بكل معنى الكلمة.”

ومع انو الست عليا بيروتية بس إنغرمت بهالبيت ولقيت فيه مهرب وملجأ فني هادي لإلها ولوحاتها وسط طبيعة الضيعة.

بيت عليا للفن، جوهرة مخباية بعين زحلتا 

 إذا زرتوا هالبيت بضيعة عين زحلتا، كتير أوقات بتلاقوا السيدة عليا عم ترسم وتبدع بعيد عن عجقة بيروت، أو عم تشتغل على تصاميم فريدة من المجوهرات الرفيعة، واللي تميّزت بهالمهنة ووصلت للعالم كلو. وأكيد بتقابلوا السيد فادي وبتتعرفوا على روحه الحلوة ونظرته الفنية. 

لمزيد من المعلومات، يرجى التواصل مع السيد فادي مغبغب على info@fadimogabgab.com. 

شوفوا كمان،متحف ال١٠٠ بيت بالبترون، شو قصة متحف هنري لوسيان؟