٥ بيوت ضيافة جبلية لازم تزوروها هالشتوية بلبنان!

عم تفتشوا على مهرب من عجقة المدينة؟ اليوم رح ناخدكن جولة على أجمل بيوت الضيافة الجبلية لي فيكن تقضوا فيها عطلة شتوية رايقة وبسيطة بلبنان.

١. ايتوس Ethos، بطمة الشوف

بيت حجر شتوي من قرميد مغطى بالأبيض من برا ومن جوا واسع وشرح وفي بقلبو محل لتولعوا نار ومحل للشوي، النومة في مريحة وفيكن تولعوا الشيميني كل الليل وتسردوها على الكستنا. وتقضوا ليلة شتوية من العمر.

الرقم: 027 661 81

٢. ميزون باتاش Maison Batache، حصرون

عبارة عن بيت حجر عتيق مع شبابيك زرق وسطح قرميد، رح يذكركن بإيام جدودنا. البيت دافي ومكنكن خرج عطلة شتوية بعيدة عن الناس، بيبعد بس دقايق مشي عن السوق وبطل عالوادي والضيعة، لتوعوا الصبح وتشربوا فنجان القهوة عرواق إنتو وعم تستمتعوا بأجمل منظر.

الرقم: 848 001 81

٢. ماي ستون سيلر My Stone Cellar، دوما

يلي زاير دوما بيعرف إنها وحدة من أجمل الضيع الشتوية بلبنان! كل البيوت بتكون مغطاية بالأبيض والرواق وين ما كان. هالبيت عبارة عن قعدة حجر دافية مكنكنة بعيدة عن العالم والضجة وكل شي في رح يريحكن. وما في أحلى من إنو الواحد ينام كم يوم بهالضيعة ويوعى بكير على المنظر الحلو يلي بخليكن تحسوا إنكن بشي ضيعة سويسرانية. بييعد هالبيت بس دقايق عن سوق دوما الأثري.

الرقم: 485 283 71

٣. بيت اللقلوق 1808 Laklouk، اللقلوق

باللقلوق بتكونوا قراب من بيستات التلج وبنفس الوقت التلج كلو حواليكن والطبيعة غامرتكن. هالبيت عبارة عن دار ضيافة تراثي مع بواب على شكل قناطر وبلكون عتيق وشبابيك حمر. جوا بتكون قعدتكن دافية وبرا بتلاقو جنينة واسعة كلها خضار وشجر وقعدة حلوة بتحسسكن بأجواء الضيعة وتراث البيت اللبناني الأصيل.

الرقم: 149 657 03

٤. بيت نور، بيت شباب

بيت حجر عتيق من قرميد وكل بوابو قناطر بتطل على أجمل المناظر الخلابة. بالشتوية بتستأنسوا بقعدة الضيعة العتيقة مع كل وسايل الراحة لي ممكن تطلبواها. والحلو بهل بيت لي بيشبه الفيلا إنو فيكن تحجزوها كلها لإلكن ورفقاتكن وتقضوا وقت سوا بلا ما حدا يزعجكن أو فيكن تجوا مع حبيبكن. الشتوية بالضيعة إلها طعمة خاصة وأكتر شي بتحسوا فيها بس تكون الدني عم تتلج برا وإنتو قاعدين جوا دفيانين.

الرقم: 550 218 70

٥. بيت ساقي، سقى رشميا

بيت حجر قاعد بالضيعة وبقلب الطبيعة بعيد عن الناس وعن الدني كلا. الغرف مريحة ودافية، رح يذكركن بإيام الشتوية بالجبل مع التيتا والجدو. بيستقبل بيت سقي أربع ضيوف مقسمين على غرفتين نوم والصبح رح تستمتعوا بأطيب ترويقة لبنانية مع فنجان قهوة حد النار أو بالجنينة حسب شو عبالكن!

الرقم: 849 279 03

شوفوا كمان، ٩ أوتيلات ومنتجعات مكللة بالتلج بلبنان!