بتعرفوا إنو في ماركة شوكولا بيروتية وصلت لبنان للعالمية؟ يمكن مش كتار يلي بيعرفوا إنو صناعة الشوكولا شي بيتميز فيه لبنان – شوفوا معنا هالقصة.
صناعة الشوكولا، هالرفاهية النادرة ما كان حدا بيحلم فيها بالمنطقة غير بيروت… وكان لبنان بوقتها متلو متل سويسرا عم بيستورد ويصدر ويصنع شوكولا وشو شوكولا ولا أطيب من هيك شوكولا!
حكايات الزمن الجميل بلبنان ما بتخلص وحكاية اليوم إلها طعمة خاصة، حلوة ساحرة… بتفوت على القلب دغري وعلى كل حواسنا وأحاسيسنا وأفكارنا.
Credits: Gandour
بحسب موقع غندور، محمود غندور، هالاسم اللي لازم نحفظو منيح، فتح محل حلويات زغتور ببيروت سنة 1895 وكان أول حدا ببيع الشوكولا الصلبة المعمولة على الإيد بقلب المحل.
Credits: Gandour
مع ازدياد شعبية الشوكولا بلبنان، افتتح غندور مصنع حلويات حديث سنة 1912 وهيك بلشت الخبرية وهيك صارت منتجاتو بقلب كل بيت لبناني، من الشوكولا للبسكويت للشوكولا بالوافر، كل الناس صارت مدمنة على شوكولا غندور.
Credits: Gandour
الجودة! مصنع غندور اتبع أعلى معايير الجودة، وصار الأشهر والأضخم بلبنان وشوي شوي صار يدخل لدول الشرق الأوسط وبعدين للعالم.
Credits: Gandour
الحاج عبد القادر غندور أسس مصانع عيلة غندور، وصار يورتها جيل ورا جيل وبعدنا لليوم مناكل غندور. حافظت المصانع على استمراريتها، فتطورت وتوسعت ونمت والمميز بهالماركة إنو ولا مرة بعودونا على الروتين، على طول بيبتكروا شي جديد وبس نكون عنجد مشتاقين لطفولتنا ما في غير شوكولا غندور بخلينا فرحانين.
Credits: Gandour
الشوكولا، البسكويت، الحلاوة، الطحينة، السمسمية، الراحة، ودبس الخروب، بالإضافة لمنتجات أخرى بتشهي.
Credits: Gandour
من قلب مصنع زغير ببيروت، وصلت منجات غندور للعالم كلو.
Credits: Gandour
توسعت الشركة للسعودية بين سنة 1986 و1989، فكانت الشركة الأولى يلي بتصنع الشوكولا والعلكة هونيك وهيك بلشت الشركة تكبر أكتر وأكتر.
Credits: Gandour
واليوم بعد سنين من النجاح، وصلت بضاعة غندور للهند، لأميركا الشمالية والجنوبية، لكندا، أوروبا، وشمال أفريقيا، والخليج العربي والشرق الأوسط.
Credits: Gandour
من بعد النجاح الكبير بصناعة الشوكولا، ما وقفت الخبرية هون، الشغف بالعمل الصناعي دفع غندور للتوجه نحو صناعات تانية، متل تحويل الورق لقرطاسية مدرسية ومكتبية.
Credits: Gandour
فهيك أسست عيلة غندور شركة SIPS بالسنغال، يلي هي عبارة عن مصنع لتحويل الورق لي بيشمل القرطاسية المدرسية والمكتبية وتصنيع الكتب، إضافة لتصنيع الورق الصحي يلي تسمى “KLEENEX” والفوط الصحية والحفاظات وبعدنا لليوم منسمي الفوط كلينكس هون بلبنان.
الطربوش، بسكويت Lucky 555، لوح شوكولا الأونيكا وعلكة “شكليس”، ولو قد ما كبرنا رح يضلوا هالمنتجات مرافقينا وجزء من ذاكرتنا وطفولتنا لو وين ما رحنا وسافرنا!
Credits: Gandour
تحية حب لغندور!
شوفوا كمان، تعرفوا على السيدات الاولى يلي عرفن لبنان!