٥ محلات بتعمل أطيب فش برغر بلبنان!

بما إنو الدني صيام قررنا نجرب بعض المحلات يلي بتعمل فش برغر بلبنان لأن بيجي عبالنا برغر لو ما فينا ناكل لحمة، لهيك جمعنالكن محلاتنا المفضلة وخبرناكن عن تجربتنا.

١. ملك الطاووق، كل الفروع

جربنا من كم يوم الفش برغر عند ملك الطاووق وكتير حبيناها. أول شي العرض موجود بس بفترة الصيام، بيجي معو بيبسي وبطاطا، والبرغر كتير طيبة وخفيفة ومنا دلعة أبداً والسمك المقلي بيقرش قرش.

الرقم: 1592

٢. خيرات البحر، الضاحية

هيدا المحل عندو كل أنواع المأكولات البحرية، والفش برغر عندن شي خيالي ومتل ما بقول المتل الشهير “عطي خبزك للخباز ولو أكل نصو” (ما تعتلوا هم ما رح ياكل نصو) بس هاي لنقلكن قدي طيب ولأن السمك شغلتن، خبزة محشية سمكة مقرمشة، سلطة وبطاطا مقلية مع صوص بتشهي.

الرقم: 859 585 70

٣. Burger Lovers، المنصورية

هيدا المطعم بيعمل أطيب أنواع البرغر متل البرغر على فطر أو الميكسيكانو وحتى التشيز برغر يلي قصتو قصة. إنشهر كتير بالبرغر الروعة وسندويشاتو الأروع. عندن كمان الفش برغر يلي بيجي بقلب خبزة محمصة بس أنجق مع قطعة سمك مقلية، سلطة وبطاطا وصوص روعة وقطع كبيس. تشهيتوا أو بعد؟

الرقم: 838 848 71

٤. تايغرز Tigers، الحازمية

هالمحل عندو كل شي من سندويشات لسلطات واشهى الأطباق. بيعمل فش برغر مع بطاطا وسلطة ع جنب. ما فينا نوصفلكن قدي غير شكل! وحتى لو ما كنتوا صايمين لازم تغيروا شي مرة عن برغر اللحمة والدجاج وتجربوا البرغر ع سمك عندن لأن أسطورة.

الرقم: 687 287 01

٥. ميني بي Mini B، الدكوانة

هالمحل معود يجبلكن أطيب الأطباق يلي خرج تخبصوها مع رفقاتكن يعني كل شي برغر وبيتزا وسندويشات ومناقيش. ومع إنو هلق محرومين من اللحمة، مش يعني لازم نحرم حالنا من البرغر كمان. هون أطيب فش برغر مع صوص تارتار وكبيس وخس من غير عالم، وكل شي بأسعار مقبولة.

الرقم: 613 363 76

شوفوا كمان، ١٠ محلات عم بقدموا أكل صيامي بلبنان!