شو أول مطعم إيطالي فتح بلبنان؟

مين منكن سامع بمطعم “باتيستا” و”فندق باتيستا“؟ هيدا المكان كان رمز الفخامة والرقي ببيروت من زمان!

^{Credits: Old Beirut}

اليوم رح نخبر خبرية “مستر باتيستا” هالمطعم الأسطورة. وبحسب صحيفة “الشرق الأوسط“، “مستر باتيستا” فتح أول مطعم وفندق ببيروت سنة 1849. من هونيك، بلشت رحلة المطبخ الإيطالي اللذيذ لي غزى قلب العاصمة اللبنانية وقلوب اللبنانيين.

شو كان “مستر باتيستا” يعمل؟ كان يقدم أكلات تقليدية جايبن من روما وفينيز ونابولي، من بيتزا وباستا وريزوتو وغيرن من أصناف اللحوم والحلويات الشهية. هالأكلات كانت جديدة علينا بوقتها، بس من أول كدوشة عرفنا إنو هيدي قصة حب ما رح تخلص. وصار المطعم نقطة تجمع لكل اللي بدهن يجربو غرايب إيطاليا ببيروت ولكل مين حابب ياخد حبيبتو على محل جديد ولكل مين عندو عزيمة وضيوف وعبالوا يبيض وج قدامن.

وهيك شوي شوي بالخمسينات، صارت المطاعم الإيطالية تفتح ببيروت، أكتر شي بمينة الحصن وفردان والروشة. بقولوا إنو العيل الإيطالية يلي استقروا عنا وصاروا منا وفينا، هني اللي فتحوا هالمطاعم. وشوي شوي، صار في عنا مطاعم أسطورية متل “222” و”كوفاديس” يلي كانوا يجذبوا العالم على روايح البيتزا الطالعة من الفرن وصحون الباستا الكريمة السخنة.

^{Credits: Old Beirut}

كل جيل منا عندو ذكريات خاصة مع المطبخ الإيطالي. جيل الستينات والسبعينات كان عندن “كوفاديس” و”بوباي“، يلي كانوا يقدموا أطباق ريفية وبسيطة بس كتير لذيذة. جيل التسعينات كان يتحمس ع “سكوزي” ومحلات بيتزا جديدة فتحت بوقتها. واليوم، صار عنا مطاعم إيطالية قد ما بدكن متل “ماريولينو” و”ماريو إي ماريو” و”أبيتيتو” و”بوتشا” يلي بياخدونا برحلة على روما مع كل طبق.

لبنان وإيطاليا قراب، يمكن مش بالجغرافيا، بس على الأكيد بالعادات والأكل وبحب الحياة والموضة. طول عمرها بيروت الزمن الجميل بتحتفل بالمطبخ الإيطالي وكانوا يعملوا مرتين بالسنة “أسبوع المطبخ الإيطالي”ويعزموا شيفيي طليان وكانو مصممين الأزياء الطليان يتعاونوا مع المصممين اللبنانيي وكان يعتبر لبنان بوقتها جسر العبور الحضاري بين الشرق والغرب وكان لإيطاليا حصة كبيرة.

^{Credits: HODL}

شوفوا كمان، لقينا ١٠ مطاعم إيطالية لقعدة رومانسية مع الحبيب!