شوفوا معنا المسلسلات اللبنانية المشتركة برمضان 2024!

رمضان 2024 على البواب ومتل كل سنة المسلسلات اللبنانية المشتركة بتكون حاضرة بقوة! هالسنة، تحضروا لمزيج من التشويق والرومانسية والدراما الإجتماعية مع مجموعة من النجوم المفضلين عندكن.

بهالمقال، رح نعرفكن على 4 مسلسلات من أهم المسلسلات اللبنانية المشتركة هالسنة:

١. النسيان

عودة قوية لسيرين، بس هالمرة بطريقة مختلفة ومشوقة كتير! سيرين عبد النور رجعت بقوة للموسم الرمضاني 2024، بس هالمرة مع الممثل السوري قيس الشيخ نجيب! ١٥ حلقة من هالدراما الإجتماعية المشوقة رح تخليكن تنسوا همومكن شوي زغيرة هالموسم الرمضاني. بتدور أحداث المسلسل حول حياة زوجين عايشين حياة زوجية سعيدة مع ولادن لحين حدوث أمر بشقلب حياتن كلا. “النسيان” عنوان المسلسل، لهيك من المتوقع هالمسلسل ينسيكن كل شي، وأكيد رح تضحكوا، وتتأثروا، وتتعلقوا بالقصة.

٢. نظرة حب

٣٠ حلقة من الرومانسية والدراما مع ثنائية جديدة: باسل خياط وكارمن بصيبص لأول مرة سوا! “نظرة حب” إسم المسلسل، بس عن شو بتحكي القصة؟بتحكيي عن حب من أول نظرة… نظرة حب غيرت حياة البطلين وخلقت فين مشاعر دفينة خلتن يحسوا بالحياة مرة جديدة. رجع باسل خياط على الدراما الرمضانية بعد غياب سنة وهالمرة بقصة حب جديدة وفريش بينو وبين كارمن فيها غموض ورومانسية. ناطرين أول حلقة على أحر من الجمر لنعرف أحداث المسلسل!

٣. 2024

رح تلعب نادين نسيب نجيم الشخصية المفضلة عند كتار منا، النقيب سما عقل ولمرة جديدة هالموسم! بس هالمرة مش بمسلسل “2020” بمسلسل جديد بعنوان “2024”. ١٥ حلقة من التشويق والإثارة مع قصة مختلفة تماماً، وشخصيات جديدة كمان. أكيد مش رح تخلو من شريك جديد لنقيب سما، بس مين هوي يا ترى؟ الممثل محمد الأحمد، هالثنائية عم تجتمع لأول مرة حول القضية المعقدة لي ما تسكرت بعد.

٤. ع أمل

ماغي بو غصن ومهيار خضور رح يجتمعوا السنة بمسلسل “ع أمل”. إسم حلو، بس الحكاية كتير أعمق من هيك. عبارة عن مسلسل إجتماعي في من كل شي: ضحك، بكي، حب، خوف، مفاجآت، وصدمات! رامي حنا مخرج المسلسل وبطولة بديع أبو شقرا وعمار شلق ورح ينعرض قريباً على شاشة الMTV. أولكن شو هني المشاكل والأزمات لي رح يواجهوها هالبطلين؟ كيف رح يقدروا يتغلبوا عليها؟ كشفت ماغي بو غصن من خلال برومو المسلسل عن ظهورها بمحل عم ترقص ومبسوطة ولكن سرعان ما بتشلح القناع لي بتكون لابستو لتكشف عن وجه آخر إلها مخبى ما حدا بيعرفوا.

طبعاً، هيدي لمحة سريعة عن المسلسلات اللبنانية المشتركة لرمضان 2024. وبعيد في كتير من التفاصيل والأحداث لي ما قدرنا نعرفها عن كل مسلسل بس الأكيد إنو رمضان هالمرة مش بس رح يكون سهرات وإفطارات وتجمعات عيلية حول المسلسلات التركية، رح يكون كمان في مجموعة مميزة من المسلسلات اللبنانية الجديدة واللي كتير منتظرين نشوفها.

أي مسلسل حابين تحضروا أكتر شي؟ شاركونا بالتعليقات!

شوفوا كمان، صور أشهر الفنانين اللبنانيين من إيام الطفولة!