بطل من الجنوب: شاب لبناني عم بيساعد الحيوانات من تحت القصف

بسبب العدوان المتواصل على القرى و البلدات بقلب جنوب لبنان، صار فيها كتير من الحيوانات الأليفة اللي انتركت بالشوارع واتشردت وهيدا عدا عن قتل العديد من المواشي. وصار حتى الحيوان بالجنوب ضحية القصف المستمر. وللأسف ألاف من الناس اضطرت تنزح ع مناطق هادية أكتر أو آمنة، بقيت هالحيوانات لحالها من دون ما حدا يطعميها أو يعتني فيها. ومن هون بلشت قصة بطل من بلدنا قرر يعتني بالحيوانات ع مناطق حدودية خلال هالوضع المقلق! تعرفوا معنا ع الشاب قاسم حيدر.

رسالة قاسم وصلت بعد ما نشر فيديو مؤثر ع حسابه ع تيك توك. توعد قاسم انو يعمل جهدو لعلاج ورعاية كل الحيوانات المصابة حتى ترجع لصحتها. وأخدها مسؤولية ع عاتقو وتعهد من باب المحبة والرفق بالحيوان انو يساعد حيوانات المنطقة. 

@kassem.haydar

أعدكم بأنني سأعالج جميع الحيوانات التي أصيبت نتيجة الحرب في المنطقة الجنوبية، حتى لو وصل عددها إلى أكثر من 1000 حيوان. وأدعو الله أن تتم هذه الهدنة التي يتحدثون عنها.

♬ original sound – kassem haydar

وكان قاسم ع قد كلمتو! وبتشوفوا بفيديوهاتو ع TikTok عم يقصد المناطق المتأثرة بالغارات الجوية والقذائف. ومعو أكل للحيوانات الشاردة اللي عم تحاول تبقى على قيد الحياة. وهون بتشوفوه هوي عم ينقذ كلب بضيعة مركبا:

@kassem.haydar مساعدة الحيوان واجب❤️‍🩹بلدة مركبا❤️‍🩹 وتم تخليص كلب علقان في منزل في البلدة#💔💔💔 ♬ الصوت الأصلي – مـ༈ۖ҉ـلَكـ༈ۖ҉ـ. آلَحـ༈ۖ҉ـرؤفـ

بالفيديو تحت، فيكن تشوفوه كمان عم بيزور بلدة عيترون اللي انقصفت بشكل مكثف بس ليطعمي الحيوانات الضالة:

@kassem.haydar From under the rubble I will feed you مت تحت ركام ساطعمكم💔 مساعدة الحيوان واجب❤️#💔💔💔 #fyp ♬ الصوت الأصلي – فضاء الهمسات❤

قاسم حيدر هو مثال المواطن اللبناني اللي قلبو طيب وعندو رحمة، وهدفو يحمي مجتمعو وبيئتو. قاسم حط مقياس جديد للبطولة بوطنّا لكل حدن عندو الحس الإنساني اللي ما بيفرق بين إنسان وحيوان.