تعرفوا على أشهر وصيفات ملكات جمال لبنان!

بعد ما وقفت مسابقة ملكة جمال لبنان من العام 2022، ولأن شتقنا كتير لمسابقة ملكة جمال لبنان ولصبية جديدة تتوج على عرش الجمال اللبناني لهيك حبينا نحنا نتناول الموضوع من ناحية تانية، كلنا منتذكر ملكات الجمال بس مش الكل بيتذكر وصيفات ملكات الجمال يلي البعض منن اتجهوا لعالم تقديم البرامج والبعض الآخر لعالم التمثيل ولمعوا. لهيك حبينا نذكركن اليوم بأشهر وصيفات ملكات الجمال يلي قرروا يخوضوا عالم الاضواء.

١. نبيلة عواد، 2010

مذيعة الMTV الحلوة أكيد ما فينا نقول عنا أشهر من ملكة الجمال رهف عبدالله لأن كل صبية كان عندها مشوارها المميز، لكنّ ما فينا ننكر إنو نبيلة صارت مذيعة من الطراز الأول ومذيعة ومحاورة محبوبة وأكيد موهبتها هي يلي وصلتها للنجومية، لدرجة إنو ما حدا بيعرف إنها كانت الوصيفة التانية لملكة جمال لبنان 2010.

٢. رومي شيباني، 2012

كلنا منتذكر بس شفنا هل صبيتين يلي حبيناهن كتير، طلعت رينا وقتها الملكة وإختها التوأم رومي الوصيفة الأولى وكلنا بعدنا لليوم بس نذكر رينا ما فينا ما نجيب سيرة رومي.

٣. سينتيا صموئيل، 2015

وصيفة فاليري أبو شقرا، هي عارضة أزياء وممثلة لبنانية شاركت بعدة أعمال ومسلسلات وصارت وجه معروف على وسايل التواصل الاجتماعي.

٤. ريم خوري، 2017

كلنا منتذكر البنت المهضومة “جودي” يلي شاركت ببطولة البيض الأبيض بس مش الكل بيعرف إنها كانت الوصيفة التالة لملكة جمال لبنان 2017 بيرلا حلو، خاضت ريم تجربة التمثيل وبرعت بالأدوار لإلها.

٥. لاميتا فرنجية، 2004

مين ما بيتذكر البنت الشمالية يلي ظهرت لأول مرة بمسابقة ملكة جمال لبنان سنة ؟2004 حلت الوصيفة الأولى ل نادين نسيب نجيم ولفتت نظر الجميع بوقتها، هي عارضة أزياء ومذيعة وناشطة بشكل كبير على وسايل التواصل الاجتماعي.

٦. أنابيلا هلال، 2005

مقدمة برامج وعارضة أزياء وزوجة الدكتور نادر صعب، ظهرت لأول مرة بمسابقة ملكة جمال لبنان سنة 2005 وحلت وصيفة لملكة جمال لبنان يلي كانت بوقتها غبريال أبي راشد.

٧. ساشا دحدوح، 2007

مقدمة برامج انتقلت من الnbn الLBC والأن وغيرن من المحطات وهي الوصيفة التالتة لملكة جمال لبنان عام 2007 نادين ويلسون نجيم، نعرفت ساشا بأدوارها الرمضانية وأبرزها للموت 3 ، النار بالنار، العودة ، أولاد آدم وبيروت سيتي.

٨. كاتيا كعدي، 1998

برعت كاتيا بمجال تقديم البرامج قبل ما تخوض عالم التمثيل وتستلم أدوار بطولية، وهي وصيفة أولى لملكة جمال لبنان عام 1998 كليمانس أشقر، من أبرز أعمالها التمثيلية مسلسل امرأة من ضياع، الحب الممنوع، متل القمر، البيت الأبيض، وحب حرام.

٨. كارولينا نصار، 2011

مقدمة نشرات أخبار على قناة سكاي نيوز عربية، عملت كمذيعة أخبار بقناة MTV بين عام 2012 و 2019 قبل ما تنتقل على الإمارات. حلت كارولينا الوصيفة الأولى لملكة جمال لبنان عام 2011 يارا خوري مخايل.

مين المفضلة عندكن؟

شوفوا كمان، لبنانيات تزوجوا مشاهير عالميين.