أجمل تيترات المسلسلات اللبنانية برمضان!

بتتذكروا تيترات المسلسلات الحلوة يللي كانت تحمسنا بالشهر الفضيل؟ تعوا نتذكرها ونحكي عن تيترات مسلسلات رمضان بلبنان تركت بصمة علينا فينا بهل لايحة يللي فيها ١٢ غنية من مسلسلات كتير منحبها.

١. يا بتفكر يا بتحس، شيرين عبد الوهاب

حقق نقلة نوعية بعالم الدراما المشتركة، “خمسة ونص” قصة حب غريبة بتجمع بين دكتورة ورجل حزب، حاولت الدكتورة تخلي حبيبها يلي بحب المصاري والسلطة يصير متواضع وما قدرت. ومن ورا هالمسلسل انشهرت غنية شيرين كتير وكل الناس صارت تحبها.

٢. قلبي دق، مروان خوري

من أهضم مسلسلات لكارين رزق الله، حقق “قلبي دق” نجاح فظيع من أول حلقة بسبب الهضامة والكوميديا وقصة الحب المهضومة. غنية “قلبي دق” يللي أداها مروان خوري أضافت لمسة دافية على المسلسل، وصارت من أشهر أغاني المسلسلات اللبنانية.

٣. لو، إليسا

حقق مسلسل “لو” نجاح كبير بسبب دور نادين نجيم الروعة إلى جانب عابد فهد، وصارت غنية “لو” بصوت إليسا رمز لقصص الحب الصعبة والمستحيلة.

٤. متل القمر، وسام صليبا

من أشهر المسلسلات يلي عرضتها الMTV على رمضان، بطولة وسام صليبا وستيفاني صليبا، بيروي المسلسل قصة حب ولدت وسط صراع بين طبقة الفقرا والغنايا. حققت غنية “متل القمر” يلي غناها وسام صليبا نجاح كبير، وصارت على كل لسان بهيديك الفترة.

٥. يا ريت، إليسا

بينقل المسلسل الواقع اللبناني والسوري من زاوية إنسانية وإجتماعية، مزيج من قصص الحب والخيانة والتسامح. وإجت غنية يا ريت لتضفي على جمال المسلسل جمال.

٦. حبة كراميل، نوال الزغبي

مسلسل “كاراميل” بطولة ماغي بو غصن، ظافر عابدين، كارمن لبس إلى جانب نخبة من نجوم الدراما اللبنانية، خاضت نوال الزغبي بهالمسلسل تجربة غنا تترات المسلسلات الرمضانية لأول مرة.

٧. حبي الأناني، مروان خوري

قصة المسلسل مأخودة من فيلم “Indecent Proposal” بتدور قصة العمل حول عازفة تشيللو شهيرة عايشت صراع مع مشاعرها تجاه رجالين، الأول هوي عازف البيانو وجوزها والتاني هوي رجل الأعمال يلي ساعدن على تأسيس مشروع عمرن بعد ما فرض شروط عليها.

٨. ومشيت، جاد القطريب

بيحكي عن قصة كارين رزق الله “مايدا” الزوجة الحامل يلي تخلت عن زوجها “أمل” العقيد بالجيش اللبناني وهاجرت على كندا، وقررت ترجع بعد 16 سنة على لبنان حيث استرجعت ذكريات الماضي والمعاناة يلي عاشتها وخلتها تهاجر مع طفل ببطنها بلا ما حدا يعرف.

٩. مش أنا، مروان خوري

بتخبر قصة المسلسل عن شخصية “هنا” مجوزة من رجال ختيار بس عندو ثروة كبيرة، بيتوفى بالمستشفى إثر عارض صحي بس هي من بعد ما صار معها مصاري صارت نفسيتها بشعة وتفش خلقها بكل الناس وبس تلتقي بمجد يلي جايي يتقاسم الورتة ببلشوا يحبوا بعض وبعدين بتخبروا عن سبب تصرفاتها وبتصير تتغير.

١٠. أنا بصراحة، مروان خوري

بتجسد كارين شخصية “جهاد” فنانة مشعوطة شوي وخوتة ومهضومة كتير جربت تنتحر وما قدرت لأن خلصها الدكتور نسيم من الموت وصاروا يتساءلو عن ماضين وينبشوا عن حقايق قديمة.

١١. أوقات، ناصيف زيتون

عانت “سحر” و”ريم” بالماضي من الفقر والظلم فاتفقوا على سرقة مصاري الأغنيا بعد ما كبروا سوا بالملجا وأضافت غنية ناصيف على المسلسل دفا ووجع.

١٢. مجبور، ناصيف زيتون

سلسلة لنفس المسلسل “الهيبة”، هالمسلسل اللبناني السوري لي حقق نجاح كبير خصوصي بسبب كاركتير شيخ الجبل يلي انغرموا في البنات وكل سنة كان ينزل المسلسل بحلة جديدة. غنية المسلسل كمان انشهرت كتير بسبب صوت ناصيف وصارت تنحط بكل المحلات والحفلات.

بس هيدا مش كل شي! في كتير تيترات مسلسلات حلوة ما ذكرناهن. خبرونا بهالتعليقات عن تيتراتكن المفضلة!

شوفوا كمان، وين اختفت كارين رزق الله؟