من رحم الأحزان، ولدت الكبة النية… شو قصتها؟

كتار من الناس، العرب والأجانب، بيستغربوا لما يجوا ع لبنان من أكلة اللحمة النية أو الكبة النية. بالرغم من انها وحدة من أطيب الأكلات اللبنانية، وما بتفارق السفرة التراثية. تفننوا فيها أهل بلدنا من شمالو لبقاعو وجنوبو، وكل حدن صار عندو طريقتو الشهية بصنع كبة النية. اليوم رح نخبركن عن قصة الكبة النية، أصلها وكيف إجت!

حسب مقال L’Orient Today   اللي بيتناول موضوع الكبة ع مدار الأجيال، بيخبرنا انو في قصة قديمة متداولة بين الضيع اللبنانية، ومش معروف إذا صحيحة مية بالمية ولا لا، بس بتفسر من وين اجت الكبة النية. وبتقول القصة انو أكلة الكبة النية أو اللحمة النية بترجع لزمن العثمانيين بلبنان.

أول ما دخل العثمانيين على إهدن، هرب أهل الضيعة المسيحية وإضطروا يتخبوا بين الجبال، وكان عندن شوية معزة. ولأنن محاصرين ومخبايين، ما قدروا يشعلوا نار للطبخ أو الشوي حتى ما يكمشوهن ويقبضوا عليهن. ومن هون إجت فكرة انو يجربوا ياكلوا اللحم نيّ!

وكان في شخص واحد منن ما عندو سنان وكرمال هيك، ما كان يقدر ياكل اللحمة النية متل ما هيي. فاللي عملوا انو بلش يدق اللحمة لحد ما صارت ناعمة وبتتاكل، وأكيد زاد عليها شوية بهارات وبرغل لتزبط معو. ومتل ما بيقولوا الحاجة إم الإختراع!

(Credit: Joao Sousa: L’Orient Today)

هالقصة الحزينة ولدت منها وحدة من أطيب الأكلات اللبنانية التراثية، اللي انعرفت بكل بلاد الشام. ووصلت الكبة النية حتى لشمال فلسطين وسوريا، وممكن تسمعوا كذا رواية عن كيف بلشت الكبة النية، أو حتى وين بلشت! بس اللي منعرفوا أكيد، ما حدا رح يعمل كبة نية متل اللبنانية! 

خبرونا، كنتوا بتعرفوا هالقصة؟

شوفوا كمان، ١١ طبق فتة مميز بلبنان ووين فيكن تجربوهن