شو مشاريعنا
لقينا أجمل ٧ مطاعم مع قعدة تراس بلبنان!
لأن الطقس عم بكون حلو صار بدا نعمل جولة على المطاعم لي عندها قعدة تراس بتطير العقل.
١. سكينا، فتقا
من البيوت لي فيكن تناموا فيها أو تقصدوها كرمال تزوروا المطعم لي لإلن، القعدة ساحرة والمنظر خيالي بيجذب كل عشاق الطبيعة والأكل الطيب. خلصوا أكل وعملوا تمشاية بالحديقة المجاورة وخدوا أجمل الصور.
الرقم: 225 522 70
٢. كبوش التوتة، مشمش
مطعم لبناني مع هوا جبلي وجو بيتوتي من أجمل ما يكون! بتقعدوا وبتحسوا حالكن بالبيت وفوق راسكن عريشة لتفيي من الشمسات، مراجيح، أكل بيت وقعدة على رمرمية. مش بس هيك، القهوة عندها طعمة غير بس تكون مصحوبة مع الجو الحلو والناس لي بتحبوهن.
الرقم: 358 514 76
٣. Ixsir by Montagnou، البترون
هالمحل عبارة عن جنة زغيرة بتاخدكن على محل بعيد عن العالم وساحر الجمال. بين الطبيعة الحلوة وتحت أشعة الشمس بتدفوا وبتحسوا بكل لقمة ممزوجة من المطبخ الفرنسي واللبناني مع كاس نبيد غير شكل. المحل جذاب وكل شي فيه رح يريحكن عالآخر، من الخدمة للموقع والطبيعة المجاورة.
الرقم: 464 700 70
٤.ماريولينو، البترون
إنتو وماشيين بالسوق بتشوفوا جوهرة من حجر لي هوي مطعم ماريولينو. جايبلكن المأكولات الإيطالية من روما مع شوية رومانسية، وبس يكون الطقس حلو بتقعدوا على التراس وبتروقوا بالكن وبتشموا شوية هوا نضيف وبتاكلوا أطيب بيتزا طازة من الفرن دغري.
الرقم: 555 766 76
٥. مالينا، جبيل
جبيل ما بينشبع منا وهالمطعم تحديداً ما بينشبع منو! عبارة عن جوهرة مخفية قريبة من السوق العتيق والسنسول وعندو قعدة بتشبه قعدات جزيرة كابري بإيطاليا. الأكل متنوع والفيو رح يخلي قلبكن يدق والقعدة برا بترد الروح، من أطيب الأطباق عندو المازة اللبنانية والمأكولات البحرية.
الرقم: 111 544 09
٦. Beyt Garden Café، مار مخايل
قعدة التراس محاوطة بالشجرات داير من دار مع كراسي خشب بتخليكن تحلموا شوي. البيت تراثي بإمتياز بيشبه بيروت القديمة وشوارعها الرايقة منو بترجعوا بالزمن لورا. بتنقوا الزاوية يلي بتعيطلكن وبتعبوا بطنكن بالأكل البيتوتي والحلو الموجود عندن.
الرقم: 390 761 76
٧. قصر فخر الدين، برمانا
عنجد لي بيجي لهون بحس حالو رجع على إيام فخر الدين وإيام العز! اعتبروا حالكن معزومين على الغدا عند فخر الدين بنفسو جايين لعندو على القصر، هيك الخدمة هون أكتر من ممتازة عدا عن الأكل التراثي اللبناني لي كلنا منشتهي. القعدة جوا بين القناطر الشامخة وبرا مع منظر على مد عينكن والنظر. بتلاقوا اللقمة أطيب وأطيب لما بتكونوا مع الناس لي بتحبوهن والمنظر ساحر. خلصوا أكل واستأنسوا بهيك منظر مع فنجان قهوة وصوت الطبيعة.
الرقم: 387 961 24
شوفوا كمان، ٧ محلات خرج ترويقة بجبيل.