١٥ شغلة بتذكرنا ليش منحب بيروت هلقد!

قصة حبنا لهالبلد ولهالمدينة بالذات ما بيخلص ولا رح يخلص، كل تفصيل زغير خصو ببيروت منعشقو وعايش فينا.

١. صور صخرة الروشة وقت مغيب الشمس

ما منزهق أبداً من هالمنظر لو قد ما شفنا بالصورة أو بالحقيقة، منظر المغيب بيخطف القلب.

٢. البلاكين المزينين بالزهور

في أحلى من إنو الواحد يكون عم يمشي بالشارع ويتفرج على البيوت العتيقة المزينة بالزهور والورود والأعشاب المندندلة.

٣. صبحية وفنجان قهوة على البيروتي

ما في شي بدفي القلب قد منظر أهالي بيروت هني وعم يعملوا صبحية أو يشربوا قهوة ويلعبوا طاولة.

٤. ريحة المناقيش من الأفران الزغيرة

ما في ألذ من ريحة المنقوشة بس تفوح بالشارع منصير نشتهيها لو كنا آكلين بأفخم مطعم لأن ما في متل المنقوشة.

٥. قهاوي بيروت الحلوة

القهاوي العتيقة والجديدة وقهوة القزاز هني نفس بيروت الحقيقي، كل واحد بيقصد المكان يلي بعيطلو أكتر شي بس بالحالتين رح تشعروا بدفا بيروت.

٦. الفيقة ع صوت بياعين الكعك بشوارع بيروت

“كعك كعك، مين بدو كعك” ما رح يهمنا إذا فقنا من نومتنا لأن هالصوت هوي جزء من طفولتنا وإيامنا الحلوة.

٧. البسينات بشارع بليس

في منن مزعجين وبلزقو لتعطوهن أكل وفي منن قد ما شكلن طيوب ما فيكن ما تعطوهن أكل بس أحلا منظر وقت تجي التيتا الختايرة تطعميهن.

٨. الناس عم تتشمس

أول ما تطلع الشمس ويدفا الطقس بتلاقوا كل الناس ركضت تتمشى تحت الشمسات وتتصيد وحتى بعز الشتوية.

٩. الفرجة على بنايات الجميزة

كل بنايات الجميزة وشوارعها ودراجها ذكرونا بطفولتنا وبرجعونا لأجواء بيروت القديمة.

١٠. الجواهر المخفية يلي بتشبه غنية فيروز

منعشق كافيهات بيروت متل Levant بالجميزة والمكان بمار الياس وبيت بمار مخايل، بوعو فينا ذكرياتنا وأغاني فيروز لي عايشة جواتنا.

١١. الكلاب بشوارع بيروت

مبسوطين وعم يلعبوا ويتسلوا مع أصحابن كأنن بيروتيي أصليي، بسلموا عالعالم، بيتفرجوا عالناس وبيتمتعوا بالجو معكن.

١٢. رسوم الغرافيتي الغريبة

بتعرفوا وين إنتو بالتحديد من ورا رسوم الغرافيتي متل رسومات الصبوحة وغيرن يلي منصير نوقف لنتأملن قد ما حلوين.

١٣. سيارات كلاسيكية وين ما كان

وخاصةً هالسيارة يلي دايما منلاقيها واقفة قدام محل Pizza Guys بالجميزة، ما في أحلا منن هالسيارات.

١٤. بناية “البعصة”

يمكن عيب بس والله البناية موجودة وبتشوفوها بالفيديو، منفطس ضحك كل مرة منمرق حدها.

١٥. أحاديث مع ناس ما بتعرفوهن

ياما وياما من كون ضايعين ومنسأل حدا منصير محديث يجر حديث وياما وياما بيجي زلمي ختيار بيفتح حديث معنا من دون سبب بحسسنا إنا مش غرب وعنجد نحنا مش غرب هيدي مدينتنا وكل شي.

شوفوا كمان، ١٣ كلمة لبنانية جايي من اللغة الفارسية.