حزروا شو طلعت أفضل غنية عربية بالقرن ال 21؟

حزروا شو طلعت أفضل غنية عربية بالقرن ال 21؟ من بعد ما مرق 24 سنة على صدور هالغنية طلعت اليوم أفضل غنية، بس عنجد هالغنية بستاهل لأنها كتير حلوة ولحنها كتير حلو وبعدنا لهلق ورغم مرور سنين وسنين منسمعها متل كأن أول مرة منسمعها بحياتنا ومنمبسط فيها.

بحسب ليستا جمعها الصحافي الموسيقي داني حجار ب مجلة الموسيقة العالمية Rolling Stone، أغنية “تملي معاك” للفنان الشهير والمحبوب عمرو دياب يلي رح نشوفوا هالصيفية هون ببيروت.

تعتبر غنية “تملي معاك” للفنان المصري عمرو دياب من الأغاني يلي ما بيمحيها الزمن. من وقت صدورها عام 2000، وهيي متربعة على عرش الأغاني الرومانسية بالعالم العربي وشمال أفريقيا يلي كل ما نسمعها منحس بنفس الشعور. وهيك قررت تتوج مجلة رولينغ ستون الأميركية “تملي معاك” كأفضل غنية عربية بالقرن الحادي والعشرين!

من اللحن الصيفي الحلو اللي عمرو دياب بيغني في على آلة الغيتار الرقيقة، لكلام الغنية الرومانسي اللي بيحكي عن قصة حب جميلة، لأداء عمرو دياب الرائع اللي بيوصل إحساس الغنية لقلب المستمع. بس هيدا مش كل شي، “تملي معاك” وصلت للعالمية لدرجة إنن ترجموها لـ 15 لغة تانية! تخايلوا كم واحد حافظها وبغنيها حول العالم؟

هالخبر منو مفاجئ أبداً، من وقت ما نزلت “تملي معاك” سنة 2000 وهيي مكسرة الدني، ولحد هلق كتار منا بيحطوها بالسيارة وبالحفلات والأعراس والمناسبات وما منزهق منها.

وختمت المجلة تقريرها: “كان ممكن إدراج غير أغاني لعمرو دياب بسبب شهرتها الكبيرة وتأثيرها الواسع متل” حبيبي ولا على بالو” ، و” أنا عايش”، و”ليلي نهاري” بس بتضل غنية “تملي معاك” العالمية هيي المفضلة عند الجمهور.

الجدير بالذكر إنو غنية” تملي معاك” من كلمات أحمد علي موسى، لحن شريف تاج، وتوزيع طارق مدكور، وصدرت عام 2000.

وحزروا مين طلع بالمركز التاني؟

أكيد في كتير أغاني حلوة غير “تملي معاك” وردت بهالليستا كأفضل أغاني الموسيقى العربية بالسنين الماضية ومن ضمن هالأغاني”يا طبطب وأدلع” للفنانة نانسي عجرم يلي إجت بالمرتبة التانية، واللي كمان كسرت الدني وقت نزلت وأحدثت ثورة بعالم الموسيقى، أما المرتبة التالتة فكانت غنية “C’est La Vie” للفنان خالد والمرتبة الرابعة لغنية “حبيبي دة” للفنان هشام عباس وبيرجع إيهاب توفيق بغنية “الله عليك يا سيدي” والمرتبة السادسة الغنية الرومانسية الشهيرة “يا غايب” لفضل شاكر.

والخبر الحلو كتير إنو رح نشوف عمرو دياب لايف عم يحيي حفل غنائي الشهر الجايي هون ببيروت! كلنا ناطرين هالحفلة بفارغ الصبر ويلي على الأكيد رح يغنيلنا فيها “تملي معاك” وغيرها من أغانيه المميزة.

شوفوا كمان، هيك أسعار حفلة عمرو دياب ببيروت، معظم البطاقات طارت بثواني.