بالفيديو: لقينا درب سري بياخدكن فوق شلالات بعقلين

شلالات بعقلين مقصد سياحي رائع كل صيفية، ومين ما بيطلع عبالو يطلع يقعد جنب الشلال ويستأنس بالهوا البرود؟ منطقة معروفة بطبيعتها الجبلية وشلالاتها الصافية والمتدفقة اللي جذبت كل هواة المغامرة ومحبي الطبيعة. كيف إذ خبرناكن انو طلعنا ع هالجنة الخضرة ولقينالكن درب سري بياخدكن فوق شلالات الزرقا الشهيرة!

درب سري ما بيعرفوا إلا ناس المنطقة بيوديكن ع أروع المناظر الطبيعية ببعقلين و بلبنان كلو! بس ركزوا معنا منيح، تا ما ضيّعوا الطريق. شوفوا مشوارنا بالفيديو هون ورح نخبركن عن الإرشادات لتوصلوا:

View this post on Instagram

A post shared by Beirut.com (@beirutcityguide)

من بعد ما توصلوا ع مطعم شلالات الزرقا المشهور، بتمشوا صوب موقف سيارات طريقو رملية، لحد ما توصلوا جنب حيط. من بعد الحيط بشوي، رح بتلاقوا طريق لتحت بتاخدكن جنب النهر بالزبط. بتكفوا بهيدا الدرب وبتخلّوا النهر يدلكن لحالو. ومن هونيك بتقدروا توصلوا فوق شلالات الزرقا وتستمتعوا بالمنظر والقعدة. إذا ما كنتوا بتعرفوا بهالدرب قبل، هلق صار فيكن تكتشفوها.

الطريقة مش وعرة وهينة توصلوا، وبحال حسيتوا حالكن رح تضيّعوا، سألوا ناس المنطقة وهني بخبروكن عن هالدرب السري. وما تنسوا من بعد مشواركن الزغير، تجربوا لقمة طيبة من مطعم شلالات الزرقا، من أجمل المطاعم بلبنان! يلا شو ناطرين، عزموا رفقاتكن اللي بيحبوا رياضة المشي بالطبيعة وخبروهن عن هالسر.

خبرونا، رح تزوروا شلالات بعقلين هالصيف؟

شوفوا كمان، حديقة تحت الميّ بنص بحر صيدا، شوفوا هون!