محل جديد مع قعدة ساحرة عم يعمل بوفيه مفتوح الأحد!

اليوم آخدينكن مشوار كتير حلو ومهضوم على منطقة فتري بجرود جبيل لنعرفكن على محل فاتح ما صرلو زمان ومش الكل بيعرف عنو بس عنجد هالمحل الروعة رح ياخدكن لغير عالم.

أول ما توصلوا رح تنبهروا بالديكور البسيط والألوان المليانة حياة، مشروع غلوريا فتري عبارة عن بيت عتيق عمرو فوق ال150 سنة، ملبس حجر كلو من جوا ومن برا وشبابيكو حمر متل الورد الجوري وعندو جنينة كتير كبيرة مليانة شجر وورد وياسمين، تحول من بيت لمعصرة نبيد وعرق.

كل شي بتحلموا في ببيت لبناني بتلاقوا هون، عدا عن هيك فيكن تزوروا المعصرة مطرح ما بيحفظوا النبيد وبتدوقوا كل أنواع النبيد والعرق كمان.

هلق القعدة بالجنينة بتشرح القلب وبتاخدكن على عالم الأحلام، مع كراسي ملونين وقعدات قش وألعاب للولاد وفسحة ليبرموا ويلعبوا ويتمشوا ويشموا هوا نضيف.

غير هيك بيت غلوريا فتري من جوا تراثي، في صور عتيقة معلقة وكتب وقصص بتلاقوها ببيوت الضيعة، بس الفيو من الفرندا بيعجز الكلام عن وصفو، جبال وشجر وخضار على مد عينكن والنظر، كل شي بروق الأعصاب وبريح النفسية.

بالنسبة للبوفيه المفتوح فهوي بصير كل نهار أحد ومناسب لكل العيل والأصحاب يلي عبالن يعملوا مشوار غير شكل غير عن كل المشاوير، عندن الأكل والسفرة الممدودة على مد عينكن والنظر وأكيد كل شي فريش وطازة وكل محضر ومخبوز على الإيد مع عرق ونبيد مفتوح من المعصرة.

بحضروا كمان كبة من تحت دياتن، ما في أطيب من المأكولات البلدية والطبخات اللبنانية مع شفة قهوة وجلسة من العمر ومنظر خرافي.

السعر: 45$ على الشخص
العنوان: فتري، جبيل
الرقم: 005 135 71