بتتذكروا ممثلين ماريانا: وين صاروا اليوم؟

بيحكي مسلسل مريانا عن قصة بنت صبية كبرت بالضيعة قبل ما تضطر تنزل على بيروت لتساعد أهلها مادياً وصارت تشتغل خادمة ببيت عند عيلة غنية وهيك بلشت بصراع بينها وبين حالها وبداومة بين مريانا بنت الضيعة الحريصة على مبادئها وتربيتها وبين نوايا ولاد القصر بالمدينة.

هالمسلسل تأليف مروان نجار وإخراج جنان منضور، تيتر المسلسل غناء عبير نعمة والمسلسل بطولة كارول حاج، يوسف حداد، بول سليمان، ماغي بو غصن، طلال الجرادي، سيرين عبد النور، نهلة داوود وغيرن كتير من النجوم.

شو رأيكن نرجع نتذكر أهم شخصيات هالمسلسل ونشوف وين صاروا اليوم؟

١. كارول الحاج

ممثلة لبنانية درست إخراج وتمثيل مسرحي بجامعة القديس يوسف، تجوزت جورج مفرج وعندها ولد إسمو جورج ابراهام وبنت إسمها باريس. شاركت بعدة أعمال، منها “طالبين القرب”، “مريانا” سنة 1998، ومن أشهر أعمالها “إبنة المعلم”، “ياسمينا”، “كل الحب كل الغرام”، “لا حكم عليه” سنة 2021، “بكير” سنة 2022، وشاركت كمان ببرنامج *رقص النجوم” وحصلت على المرتبة التالتة بوقتها بعد ما انصابت بوقت التمرين وغير هيك قدمت برنامج” سوبر ستار إكسترا” من سنة 2004 لسنة 2008. آخر أعمالها مسلسل “ترتيب خاص” مع الممثل مكسيم خليل لي ما انعرض على الشاشات بعد ومسلسل “النسيان” إلى جانب سيرين عبد النور وقيس الشيخ نجيب.

٢. يوسف حداد

ممثل لبناني بلش مشوارو بالعديد من المسلسلات التلفزيونية متل” العاصفة تهب مرتين”، “نساء في العاصفة”، “سنابل الحب”، “شارع الكسليك”،” مريانا”، “جمهورية نون”، غير هيك حصل على جايزة الموركس دور سنة 2007 عن مسلسل “نضال”. وكمان كان عندو تجربة بتقديم البرامج ببرنامج “لاقونا على الساحة” وآخر أشهر أعمالو مسلسل 2020 و2024 مع نادين نجيم بدور العميد غسان وهوي مجوز من السيدة أراز وعندو بوب أنجلو وجاد.

٣. بول سليمان

ممثل لبناني من بلدة عمشيت، حائز على إجازة بالهندسة الداخلية وهوي رسام موهوب وإستاذ جامعي، من أشهر أعمالو “السر”،”الشيخة الأميركية”، “مريانا”، “سنعود بعد قليل”. ومن أبرز أفلامو “القديسة ريتا 2002″، “المشهد الأخير” سنة 2005 ومن أشهر مسرحياتو “ملوك الطوايف” سنة 2001. وآخر أعمالو كانت الهيبة (جبل) سنة 2021 بدور سليم وفيلم “الرب يراني” سنة 2024 وهوي مجوز من السيدة جيني عنداري يلي بتشاركو هواية الرسم وعندو تلات بنات.

٤. نوال كامل

ممثلة لبنانية بلشت العمل الفني كراقصة فولكلورية رجعت انتقلت لعالم التمثيل وأبدعت في من بداياتها. ظهرت بعدة مسرحيات من بيناتن “بيارو أولا أحد”، “صاحب الغبطة” ومن أشهر مسلسلاتها “ثورة الفلاحين”، “جوليا”، “مريانا” وآخر أعمالها “ستيليتو” بدور دلال سنة 2022 ومسلسل “ع أمل” سنة 2024 بدور رجا.

٥. ماغي بو غصن

ممثلة لبنانية، تلقت دروس بالموسيقى بس كان عمرها 12 سنة وحصلت على الميدالية الدهبية وقتها ببرنامج “واحة الأولاد” على تلفزيون لبنان بعد ما غنت للست فيروز. درست تمثيل وإخراج بالجامعة اللبنانية وبلشت تمثيل مع المخرج الراحل أنطوان ريمي بمسلسل “الأخوان” و”المغاور” وكمان شاركت بعدة أعمال سورية وقدمت فوازير مع الممثل الكويتي داوود حسين سنة 1998 ضمن برنامج “داوود في هوليوود”. تجوزت أول مرة ورجعت انفصلت عن جوزها بعد عدة مشاكل، ورجعت تجوزت مرة تانية سنة 2008 من المنتج جمال سنان وعندها ولدين منو ريان ويارا. ومن أشهر أعمالها “الخوالي”، “دكتور هلا”، “متر ندى”، “مريانا”، “مدرسة الحب”، “كاراميل”، “أولاد آدم”، “للموت” بأجزائو التلاتة وآخر أعمالها مسلسل “ع أمل”.

٦. زينة فرجالله

ممثلة لبنانية درست مسرح وشاركت بالعديد من المسلسلات متل “طالبين القرب”، مسرحية “عرسان مدري من وين”، مسلسل” دخان ومطر” ومسلسل “مريانا” ومسلسل”الطاغية” وحالياً هيي غايبة عن الشاشة.

٧. طلال الجردي

ممثل لبناني بداياتو كانت خلال تلفزيون المستقبل حيث شارك بإعلان البرامج الترفيهية منها “حزازير”، “شو هيي الغنية” و”شو هيي القصة”، درس بالجامعة الأميركية وإنطلاقتو كممثل كانت بمسلسل “شارع الكسليك” ومن بعدها” طالبين القرب”، “بنت الحي”، “مريانا”، “لعبة الموت”، “كاراميل”، “أولاد آدم”، وآخر مسلسلاتو “ع أمل”. ومن أشهر أفلامو “تاكسي البلد”، و”من كل قلبي”. والجدير بالذكر إنو الممثل طلال الجردي ما بيحكي أبداً عن حياتو الشخصية وما حدا بيعرف إسم مرتو وولادو.

٨. سيرين عبد النور

درست محاسبة ورجعت أخدت دورات بتصاميم الأزياء وسنة 1993 بلشت العمل بمجال المودلينغ وأول عرض أزياء إلها كانت لعرض ملابس خاصة بموسم الميلاد لعدد من مصممي الأزياء منن زهير مراد وظهرت كمان بإعلان لأحد مساحيق الغسيل وببداية 1998 بلشت الظهور بمحطة الLBC كممثلة بعدد من المسلسلات متل “مريانا” و”غدا يوم آخر” سنة 2003 وحصلت على أول بطولة إلها بمسلسل “ابنتي” ومن بعدها بلشت البطولات تنعرض عليها وهيك شقت طريقها نحو الشهرة وبلشت بمشوار الغنا سنة 2004 بعد إصدارها أول ألبوم إلها “ليلة من الليالي”. تجوزت من رجل الأعمال اللبناني فريد رحمة سنة 2007 وعندها بنت إسمها تاليا وإبن إسمو كريستيانو ومن أعمالها الشهيرة “روبي”، “لعبة الموت”، “24 قيراط”، “الهيبة”، “دانتيل”، “العين بالعين”، وآخر مسلسل إلها “النسيان” مع الممثل السوري قيس الشيخ نجيب.

٩. نهلة داوود

ممثلة لبنانية درست التمثيل بمعهد الفنون الجميلة قبل ما تنطلق بعالم المسرح والتلفزيون وهيي زوجة الممثل الشهير أليكو داوود وعندها منو بنتين لين ولنا ومن أبرز أعمالها” العاصفة تهب مرتين”، “نساء في العاصفة”، “مريانا”، “السجينة”، و”أشرقت الشمس”، “الشقيقتان” و”ثورة الفلاحين”، “دانتيل”، “بردانة أنا”، و”صالون زهرة” وآخر مسلسلاتها “نظرة حب”.

شوفوا كمان، ممثلين غنوجة بيا: وين صاروا اليوم؟