سائحة أميركية زارت لبنان وإنغرمت فيه، شوفوا شو قالت!

رح تنغرموا بشو قالت سائحة أميركية عن لبنان لمّا قررت إنو تزور البلد!  مادز هي مؤثرة أمريكية ع مواقع التواصل الإجتماعي، بتسافر ع بلاد كتير وبتاخد متابعينها معها من خلال فيديوهات يومية بتنشرن ع حسابها (خصوصي محتوى السهر). فيديوهاتها الأخيرة عن رحلتها حول لبنان جذبت آلاف المشاهدات وإنتشرت بشكل واسع ع السوشيال ميديا! 

بالرغم من ترددها بالأول لزيارة لبنان بهيدي الأوضاع، ولكن بتشوفوا سعادتها العامرة بعد ما أخدت قرارها! حجزت التيكت وإجت وشافت بعينها جمال هالبلد وناسو. 

مادز بتخبرنا بفيديوهاتها إنو شافت أديه الشعب اللبناني كريم ومضياف! وين ما راحت كانت تحس أديه مرحّب فيها، تبرم الشوارع وتحسّ بالأمان ولا كأنو هي غريبة عن هالبلد! بالفيديو هون بتشوفوا تجربتها مع شاورما بربر، وأديه إنغرمت بلبنان من أول ما إجت لدرجة قررت تبقى كم يوم زيادة!

من ترويقة عند السوسي، لصفيحة اللقيس الشهيرة، مادز بتقلنا قصتها كيف إجت ع لبنان ما بتعرف حدا، وكيف فجأة لقيت حالها معزومة ع عرس ناس ولا مرة شايفيتن بحياتها! وهيدي تجربة كتار بعيشوها بلبنان، بالإضافة لحياة السهر الإستثنائية! 

راحت ع مغارة جعيتا وإندهشت، إنعجبت بروحانية حاريصا، وطلعت مغامرة بالتلفريك، وبتشوفوها عم تنغرم بلبنان أكتر وأكتر! 

وأكيد ما فوّتت عليها طلعة ع دير القمر والشوف، حضروا هون:

بهيدا الفيديو بتنعزم ع بيت عيلة لبنانية بالجبل، وبتخبرنا أديه حسّت حالها منّن وفيهن وأديه زعلت لما إضطرت تفل: 

نحنا كمان إنغرمنا ببلدنا أكتر وأكتر من بعد فيديوهات هل سائحة أميركية عن لبنان، ومنفتخر إنو هيدي صورة لبنان الحلو اللي تمثّلت بشعبو ومدينتو وجبلو وكل شي! فيكن تشوفوا المزيد من الفيديوهات على حساب مادز Mads Abroad ع الإنستغرام هون و ع التيك توك هون. 

شوفوا كمان، أبرز 25+ حفلة بشهر آب هالصيف بلبنان