شوفوا معنا مهرجانات عيد السيدة لسنة 2024 حول لبنان!

بقولوا أحلى شي بالصيفية مهرجانات عيد السيدة لأن كل العيل والقرايب بتجتمع بالضيعة وبصيروا يروحوا على ساحة الضيعة يشاركوا بالتجمعات والعشاويات القروية وبتدور الضيافة والزيارات والأكل الطيب وأكيد أهم عنصر بكون “الهريسة” أو “القمحية”. خلونا نشوف سوا مهرجانات عيد السيدة حول لبنان لهل سنة.

١. دير طاميش

هالسنة العيد بدير طاميش غير شكل وكل يوم في حفلة، ببلش المهرجان نهار الخميس 15 آب مع كرميس للولاد وزفة وسهرات موسيقية، حفل راقص للولاد، نهار الجمعة 16 كرميس وحفل للولاد وحفلات موسيقية ونهار السبت 17 آب رح يكون في عشا قروي بساحة الضيعة بيتخللو غناء أجنبي و stand-up comedy وسهرة غنائية مع الفنان هادي ضو وبيختتم المهرجان نهار الأحد 18 بكرميس وألعاب ونشاطات للولاد وحفلة موسيقية مميزة.

٢. حراجل

هالسنة متل كل سنة رح تكون ولعانة ليالي عيد السيدة بحراجل بس هل مرة رح يكون في شي كتير مميز: حفلات مميزة بنص الضيعة وجو حلو. رح يكون في حفلة للفنان ناجي القسطا ب 11 آب، الفنان هادي ضو ب 12 آب، الفنان كارلوس ب 9 آب والفنان روبيرتو شليطا ب 10 آب.

٣. القبيات

معروفة إنو بالقبيات عندن أجمل مهرجان عيد السيدة بلبنان وهالسنة محضرين قصص كتير حلوة متل عشا قروي وسوق أكل وكيوسكات ومطاعم وبيوت ضيافة مفتوحة لكل الزوار. رح يكون في بالكنيسة عروض مميزة للأطفال متل عروض غنوى وكيرميس الأطفال، رسيتال ديني بتحيي المرنمة جومانا مدور وحفل موسيقي مع الموسيقي بسام شليطا وعرض سيرك ومسرحية كوميدية مع هشام وجنى وأريج وعباس وحفل غنائي مميز مع الأخوين شحادة. رح يكون كمان في مهرجانات دولية بالضيعة مع الفنان ملحم زين نهار 9 آب والموسيقي غي مانوكيان نهار 10 آب.

٤. المتين

بالمتين الجو رح يكون استثنائي هالسنة مع أمسيات روحية وسهرات زجلية وسهرة كوميدية مع نادي أبو شبكة وأريج ورح يكون كمان في مسابقات وألعاب وحفلات موسيقية وفنية منها حفلة للفنان بافو وحفلة للفنانة ميريام بو عقل.

٥. سبعل

رح يتخلل المهرجان حفلات فنية وموسيقية وألعاب للأطفال ونشاطات ترفيهية وتحديات وهريسة العيد.

٦. الفنار

نظمت الفنار السنة مهرجان لعيد السيدة بيتضمن سوق للأكل، أعمال يدوية وحرفية ومونة بلدية وأكسسوارات ونشاطات للأطفال و Kids Zone.

٧. بقاعكفرا

بقاعكفرا من أكتر الضيع اللبنانية لي معودة تحتفل بعيد السيدة وهالسنة رح يكون في رياضات روحية ونشاطات وألعاب وكيوسكات ومونة وأشغال يدوية وصاج وبرامج فنية مميزة.

٨. صيدون

رح يكون في حفلة فنية مميزة مع الفنان مروان سعادة السبت 17 آب.

٩. فالوغا

هل سنة جو فالوغا ولا أروع: تحديات، نشاطات للولاد، سهرات فنية وموسيقية، ألعاب kids animation وغيرها من المسابقات والألعاب.

١٠. جون

رح تكون ناطرتكن بضيعة جون مجموعة من التحديات المميزة متل دق الجراس، رفع المحدلة، شد الحبل وأطول أووف وزلغوطة، حفلات موسيقية وسوق الأكل ومعرض.

١١. جزين

عيد السيدة أهم عيد بضيعة جزين وهالسنة رح يكون في سوق الأكل والشرب إلى جانب نشاطات ترفيهية وموسيقية والجو حلو وأكيد بالإضافة لزياح العدرا المميز لي بيجمع كل أهل الضيعة والجوار.

١٢. العربانية

وصل مهرجان Street Festival على ضيعة العربانية ورح يتضمن معرض وسوق أكل وألعاب للأطفال وموسيقى ونشاطات ترفيهية عديدة.

شوفوا كمان، “الهريسة ع النار”… شو هني عادات عيد السيدة بلبنان؟