مطعم الشمس صار عندو عربة آيس كريم!

مين ما بيعشق مطعم الشمس وأكل الشمس!؟ هالمطعم اللبناني المهضوم صار عندو عربة آيس كريم فيكن تعبوا من عندن كل طعمات البوظة يلي بتحبوها من الفواكة للحليب والشوكولا والكراميل وأكيد هالتحلاية ما في ألذ منا بعد الغدا.

مطعم الشمس من أطيب المطاعم اللبنانية يلي ممكن تزوروها، عندو السفرة اللبنانية يلي بتحبوها من جميع أطباق المازة اللبنانية العالية الجودة والمشاوي مع أجواء مريحة.

مشهور بأكلو اللبناني يلي بياخد العقل ومشهور أكتر شي بالبطاطا البالونات يلي بيعملها بطريقة خاصة.

وهلق جاب البحر كلو لعندو لأن عم بقدم كل المأكولات البحرية يلي ممكن تخطر عبالكن والسوشي كمان، يعني بتلاقوا عندو أكلة سمك طازة مع فيو على الطبيعة والمي.

صرلو فاتح من سنة ١٩٧٥ بعنجر ويعد من أشهر المطاعم اللبنانية بالبقاع، حتى الولاد عندن محل وفسحة وألعاب ليلعبوا ويتسلوا ويفلتوا.

بتخلصوا غدا ويلا على البوظة لتبوردوا قلبكن.

وأكيد هيدا المطعم مناسب لجميع مناسباتكن من الأعراس للخطبة، للعمادة، وأعياد الميلاد أو أي مناسبة غير مع العيلة والأصحاب.

العنوان: عنجر
الرقم: 800 620 81

شوفوا كمان، هيك بيستخرجوا الملح من البحر بالبترون.