تعرفوا على ٥ ضيع لبنانية وصلت للعالمية

ع قد ما منحب بلدنا، ع قد ما منفتخر ومننبسط لما نسمع عن إنجاز أو نجاح. خلونا نتذكر مع بعض ٥ ضيع لبنانية وصلت ل العالمية ولمع اسمها لأبعد من لبنان!

1. ضيعة دوما

ربحت جائزة افضل القرى السياحية بالعالم  لسنة 2023 بمسابقة منظمة السياحة العالمية (UNWTO). تعرفوا أكتر هون. 

دوما ضيعة لبنانية رائعة الجمال ، قاعدة على إرتفاع 1200 متر عن سطح البحر. بيرجع تاريخ دوما لعصور لورا، حافظت على العمران القديم والمعالم الثقافية، وتميّزت بالقرميد الأحمر والسوق العتيق. لتعرفوا كيف فيكن تقضوا نهار غير شكل بدوما، إكبسوا هون. 

2. ضيعة كفردبيان

فازت بلقب عاصمة السياحة العربية الشتوية ب 2024 من قبل منظمة السياحة العربية 

كفردبيان هي المقصد الأول بلبنان لمحبي التلج ورياضة التزلج، بتجذب السياح من وين كان! ومش غريب انو تفوز بهيدا اللقب! 

3. ضيعة بكاسين

ربحت جائزة افضل القرى السياحية بالعالم  لسنة 2021 بمسابقة منظمة السياحة العالمية (UNWTO). 

بكاسين من أجمل الضيع اللبنانية خاصةً إنو فيها أكبر حرج لشجر الصنوبر بالشرق الأوسط. جمال الطبيعة اللي بيفوق الخيال، مع التراث اللبناني الجنوبي، وكمان الطابع الريفي جعل من هيدي الضيعة مقصد سياحي مهم بالبلد كلو وهي من أكتر الضيع المحبوبة عند اللبنانية. 

4. ضيعة كرخا

ترشيح لجائزة كان عن فيلم «كرخا قرية من لبنان – أبطال الدار»

وصلت بلدة كرخا الجزينية للعالمية من باب السينما، الفيلم الوثائقي الدرامي تحت عنوان «كرخا قرية من لبنان – أبطال الدار» وحاز أخيراً جائزة Cannes World Film Festival. «كرخا» فيلم بتمثيل أهل الضيعة نفسها، بيحكي عن الإغتراب والوطن، وكان بمثابة رسالة عودة لكل مهاجر ومغترب. الفيلم كان بدعم من شارلي حنا، ومن إخراج السينمائي ناصيف الريس، وكتابة جولي بو شقرا.

5. ضيعة دير ميماس

ربحت الميدالية الذهبية عن أفضل زيت زيتون بالعالم بمسابقة IOOC العالمية. تعرفوا أكتر هون. 

ماركة زيت الزيتون اللبنانية “دار ميس Darmmes”، اللي بتحوّش الزيتون من ضيعة ديرميماس الجنوبية وتسمّت ع اسمها، ربحت الميدالية الدهبية لسنة ال 2023 بالمسابقة الدولية لزيت الزيتون بنيويورك NYIOOC World Olive Oil Competition، وهالمسابقة هي أهمّ وأكبر منصة عالمية لتقييم جودة الزيت وبتتضمّن أصناف متنوّعة من حول العالم. جلال الزيتون بضيعة دير ميماس هي الأفضل بلبنان، وفيها زيتون معمّر عمرو أكتر من 600 سنة!

6. جبيل

فازت بلقب عاصمة السياحة العربية لسنة 2016 من قبل المنظمة العربية للسياحة

مع إنو جبيل مش ضيعة بس حبينا نضيفها على المقال. جبيل وحدة من أقدم المدن بالعالم، حملت معها تاريخ حضارتها غني أبرزها الفينيقي. اليوم، هي وحدة من أبرز وأهم المدن اللي السياح بيزوروها بلبنان.

أي ضيع لبنانية بتعرفوا بعد وصلت ل العالمية؟