مهرجان الزلقا: أكل، رقص وفرح وموسيقى (الدخول مجاني)

بعد ما لفّ “Street Festival” بكل ضيعة بلبنان، رجع على الساحل وقرر يميل على الزلقا، وهيدي المرة المهرجان جاينا بقوة! ليش؟ لأن برنامج المهرجان مليان حفلات لأشهر الفنانين والكوميديين يلي رح يخلوا هالمهرجان ذكرى ما بتنتسى.

عبالكن تعرفوا مين رح يحيي هالحفلات؟ اليوم عالساعة 9 المسا، رح تطل علينا الفنانة ألين لحود بحفلة مليانة إحساس وطرب. الجمعة عالساعة 9:30، فرقة ناجي حنا رح تولع المسرح بأغانيها، مع إطلالة مميزة للفنان جهاد محفوظ. أما السبت، الجو رح يكون ولعان الساعة 10:30 مع الفنان هادي خليل وفرقة هياكل بعلبك يلي رح يخلوكن ترقصوا كل الليل. وختامها مسك يوم الأحد الساعة 8:30 مع الفنان جوزيف عيسى يلي رح يختم المهرجان بأحلا طريقة.

المهرجان منو بس للموسيقى والرقص، الكوميديا إلها حصة كمان! السبت الساعة 10:00 المسا، هشام حداد رح يكون حاضر بعرض كوميدي يضحككن من قلبكن. والضحك مكمل الأحد الساعة 10:00 مع الكوميدي شادي مارون. وبما أنو الولاد عندن حصة كبيرة، فغير الألعاب، رح يكون عندن عرض ترفيهي مع غنوة اليوم الساعة 7:30 المسا.

هيدا المهرجان مش بس للكبار، الزغار كمان رح ينبسطوا لأن في Kids Zone مخصصة بس للولاد، فيها ألعاب ونشاطات مسلية متل ال animation وغيرها.

وأكيد أكيد الدخول مجاني! يعني بتجوا بتصفوا السيارة، بتجيبوا الولاد والأصحاب وبتتمشوا بالزلقا وبتقضوا نهاركن عم تاكلوا وتتسلوا.

ما في أحلى من إنو تجتمع الناس على الأكل الطيب، الرقص والفرح. الزلقا رح تعج بالأجواء المرحة، الموسيقى، والعروضات الفنية. رح يكون في معارض للمنتجات والمونة، محطات للأكل والحلو، عصير وقصص كتير حلوة.

لهيك، كونوا كتار واستفيدوا من آخر إيام الصيفية!

وين: الزلقا عمارة شلهوب
أيمتى: من 29 آب ل 1 أيلول
الساعة: من الساعة 5 بعد الضهر للساعة 12 نص ليل
الدخولية: مجانية
الرقم: 420 004 81

شوفوا كمان، لقينالكن Open سمك ومازة بس ب20$ عند سمكة شهوان!