٧ مطاعم جبلية ساحرة بفاريا وكفردبيان

إذا كنتوا من عشاق الطبيعة، الهروب من ضجة المدينة، وتحبوا تكتشفوا أجمل المناطق الجبلية بلبنان، فاريا وكفردبيان لازم تزوروهن قبل ما تخلص الصيفية. هالمنطقتين مش بس معروفين بالتلج والرياضات الشتوية، بس كمان بالمطاعم الجبلية يلي بتقدم تجربة فريدة بالصيف وبكل فصول السنة. هون، رح ناخدكن بجولة على ٧ مطاعم بتجمع بين جمال الطبيعة ولذة الأكل.

١. العرزال

إذا كنتوا بتحبوا القعدات التراثية والأجواء الريفية الأصيلة، مطعم العرزال هو المطعم يلي لازم تزوروا. هالمكان مميز بقعدتو المكنكنة على الخشب، وين الشاي السخن والترويقة على الصاج بيفتحوا النفس من الصبح. بيقدموا مشاوي عالغدا، وأكلات بيتوتية بتذكركن بطعمة الجبل الأصيلة. المناظر هون ساحرة، خصوصًا لما تشوفوا الشمس عم تغيب وتغطي الجبال من حولكن. البطاطا المشوية مع التوم وفنجان الشاي بعد الأكل، تجربة لازم تعيشوها.

الرقم: 883 285 03

٢. طريق النحل

مطعم طريق النحل المكان المثالي لتهربوا من عجقة الحياة وتغرقوا بهدوء الجبال. القعدة هون بتاخدكن لبعيد مع كل التفاصيل اللي بتحسسكن بالراحة. بيقدموا أكلات لبنانية أصلية، مع نكهات مميزة بيستعملوا فيها منتجات طازة. مشهد مغيب الشمس من هالمكان شي بيطير العقل، خصوصي لما تشوفوا الجبال قبالكن والولاد عندن كمان فسحة ليلعبوا ويتسلوا.

الرقم: 394 737 03

٣. عالبيت

إذا كنتوا عم تدوروا على مطعم بيجمع بين الفخامة والبساطة الجبلية، عالبيت هو خياركن. المطعم عبارة عن قعدة حجر بيقدم أكلات عالمية مع لمسة لبنانية، والديكور فيه تقليدي. قعدة مميزة للناس يلي بحبوا القعدة المكنكنة واللقمة المميزة بجودتا.

الرقم: 468 552 03

٤. فوق الريح

إسم على مسمى، فوق الريح مطعم موجود بأعلى نقطة بالمنطقة، فيو بيطل على كل الوادي من تحت. المكان مثالي لكل حدا بيحب القعدة مع فيو ما بينتسى، وبيقدموا أطباق جبلية مميزة متل الكبة النية والمشاوي. الأجواء هون بتخلي الواحد ينسى كل مشاكلو ويعيش اللحظة.

الرقم: 807 817 81

٥. جلسة الخوابي

هيدا المطعم متل الحلم لكل محبي الطبيعة والهدوء. القعدة بين الغابات وفوق المي مع صوت العصافير هوي شي نادر تلاقوا، وأكتر شي بيميز هالمكان هوي تنوع الأطباق اللبنانية البيتوتة اللي بيقدموها. جلسة الغوابي هي وجهة مفضلة للعيل والمجموعات الكبيرة، المكان واسع وفي فسحة للأطفال كمان.

الرقم: 332 554 03

٦. جوار القمر

جوار القمر مكان بيشعرو زوارو بالألفة والضيافة الجبلية الحقيقية. بيتميز بأطباقو الشعبية متل المقانق والمشاوي، والجو هون بيشرح القلب. الموقع بين الشجر العالية والمناظر الخضرا بيعطي المكان سحر خاص، وهو مكان مثالي لكل حدا بدو يهرب من شوبات الصيفية.

الرقم: 416 955 03

٧. شي شاكر

إذا كنتوا من محبي التجارب الجديدة، شي شاكر هو المكان الأنسب. بيجمع الأكل التقليدي والجلسة الحجر العتيقة، مع أجواء جبلية بتناسب الكل. القعدة عند شاكر بتجمع بين الراحة والرفاهية، وكمان بتقدروا تجربوا أكلات اللبنانية يلي بتحبوها مع منظر بطول العمر. المناظر من التراس شي بياخد العقل، خصوي بالليل لما يضوي القمر فوق الجبل.

الرقم: 800 341 29

شوفوا كمان، ٥ بيوت ضيافة جبلية بالضيعة.