نايت كلوب للمراهقين بس! عنجد صار في هيك شي بلبنان

نايت كلوب للمراهقين بس؟ عنجد صار في هيك شي بلبنان؟ هالويك-أند، ضجت منصة “إكس” (تويتر) بتويتات عم تحكي عن افتتاح نايت جديد بس للمراهقين بمنطقة الكاسليك وإسمو Hot Spot.

ممنوع فوق ال 18!

Hot Spot هو لكل مين عمرو بين 12 و18 سنة وعبالو يسهر وينبسط مع رفقاتو، وممنوع حدا فوق الـ18 يفوت. هالمكان فتح بوج شريحة المراهقين يلي عمرن بيمنعن من السهر، خصوصي إنو النايتات ما بتستقبل حدا تحت الـ18.

النايت الجديد، عم بشد أنظار المراهقين، مش متل أي مكان عادي. الملفت بهالمكان إنو ما في كحول، لا دخان، ولا حتى أراغيل. بيفتح بوج كل بنت وصبي حابب يسهر بمكان آمن وينبسط. الكل عم يحكي عن العصير اللي بيقدموها، من عصير العنب، كوكتيلات بلا كحول، وحتى بيرة بلا كحول. هالمحل بلّشت فكرتو لما صاحبة المحل كانت عم تبرم ع مطرح مناسب ليحتفل إبنها بعيد ميلادو وما كانت تلاقي.

المكان صار حديث الساعة بين المراهقين لأنو أخيراً صار فيهن يحتفلوا بعيد ميلادن، أو أي مناسبة، بمكان مناسب لعمرن. وبتعرفوا شو؟ حتى في شي عندن “نبيد” صفر كحول، يعني عصير عنب مناسب لكل حدا عمرو تحت 18.

كل جمعة وسبت، هالنايت بيعمل حفلات theme party، يعني فين المراهقين يلبسوا على ذوقن ويحضروا حفل بحسب الموضة أو الطابع اللي بيختاروا. والأحلى إنو الموسيقى بتكون مناسبة لكل الأذواق، من البوب للراب، وكل المراهقين بيقدروا يرقصوا ويغيروا جو.

النقطة القوية بهالمكان إنو الأهل بيقدروا يرتاحوا. بيعرفوا إنو ولادن عم يسهروا بمكان آمن، لا في كحول، لا دخان، وكل شي تحت السيطرة. بيسمحوا للصبيان والبنات ينبسطوا ويرقصوا من دون أي مخاطر لعمرن أو مشاكل.

بس، متل العادة، في ناس مش مع الفكرة. في قسم كبير من الناس رحبوا بالمبادرة ولقوها ذكية، خصوصاً بهالعصر يلي كل شي فيو تأثيرات مش كتير منيحة للمراهقين. أما القسم التاني، فلقوا الفكرة مش كتير ظابطة، وعم يسألوا: “هل المراهقين بيحتاجوا عن جد لمكان يسهروا في؟ ولا بعد بكير ع هالشي؟”

النقاش مستمر، وإنتو شو رأيكن؟

فيكن تشوفوا حساب Hot Spot على الإنستغرام هون.

العنوان: الكاسليك
الرقم: 501 222 03

شوفوا كمان، ٥ طرق لحماية المراهقين على تيك توك