سفاري وكياكينغ ونومة ببيت بجرود لبنان… مغامرة بتجمع كل شي!

هالمشروع الجديد بيجمع بين المغامرة والطبيعة بطريقة ما بتتكرر. بتبلشوا الرحلة بسفاري عالجرد، وبتقسموها بين 4 أشخاص. أول ما توصلوا، بتكونوا جاهزين لمغامرة الكياكينغ بقلب بحيرة اليمونة، وهونيك فيكن تغطسوا بجمال الطبيعة. بعد الكياكينغ، بتحضروا حالكن لرحلة هايكينغ بجرود العاقورة، وبتوصلوا على سيدة القرن، المكان يلي بيحبس الأنفاس من جمال الفيو.

هالكنيسة المعروفة بإطلالتها الرهيبة بتخليكن تحسوا حالكن فوق العالم، وكل تعب الهايك بيزول قدام المناظر الساحرة يلي بتطل على كل شي حواليكن.

وما خلصنا هون! فيكن تزوروا شلالات رويس لتبوردوا قلبكن، وبعدها كنيسة سيدة الحبس، يلي واقفة على شير بطل عالبرك والمناظر الخلابة. ما تفوتوا كمان فرصة زيارة المغارة بالضيعة، يلي رغم إنها مش معروفة كتير، بتشبه مغارة جعيتا بجمالها وروعتها.

إسم المشروع “جرود العاقورة“، موجود ببلدة العاقورة، وهوي بلا شك من أجمل المشاريع بالمنطقة، وإذا بدكن الصراحة، من أجمل المشاريع بلبنان. بتاكلوا عندن لقمة بتجنن، وبتكملوا النهار مع منظر غروب الشمس يلي بياخد العقل على برك العاقورة.

وبما إنو التجربة ما بتكمل بلا ليلة بالمكان، فيكن تناموا عندن ببيت ضيافة، وبيعملولكن سهرة نار كتير حلوة. والصبح، بتفيقوا على ترويقة بلدية شهية. وإذا كنتوا بتحبوا المشاوي، فيكن تعملوا هالشي كمان.

المشروع مش بس مغامرة، هوي رحلة تراثية وثقافية بتعيشوا فيها تاريخ العاقورة بكل تفاصيلها. والأسعار؟ كتير مقبولة ومعقولة. ما تضيعوا الفرصة، وخبروا أصحابكن ليلحقوا الصيفية قبل ما تخلص.

العنوان: العاقورة
الرقم: 665 375 70

شوفوا كمان، ٦ كافيهات مع قعدة جنينة ببيروت.