فرن غطاس عم يقدم مناقيش ببلاش للنازحين!

بخطوة حلوة لدعم العائلات النازحة بلبنان، أطلق فرن غطاس بالحازمية مبادرة لتوزيع مناقيش مجانية ع كل لبناني نازح.

صاحب الفرن غطاس معلّق لافتة ع فرنو “أخي اللبناني النازح، الفرن فرنك خذ ما تحتاج مجاناً”.

 بمقابلة مع تلفزيون LBC، كانت رسالة غطاس لكل نازح إنو “يجي وراسو مرفع، لأنو هيدا لبناني وخيّنا”، وبقول ” بالأزمة إجباري بدنا نكون حد بعضنا”. وكان من اللافت إنو فرن غطاس عمل نفس المبادرة وقت إنفجار المرفأ وضلّن يوزعوا مناقيش يومياً ع ٤ أشهر ويودوهن ع الأشرفية. 

 المبادرة بسرعة لاقت دعم واسع ع مواقع التواصل من جهة، والجهات أو المتطوعين اللي عم يساعدوا بالتوزيع ع مراكز الإيواء من جهة تانية، خاصةً إنو الفرن عم يوزّع بين  800 – 1000 منقوشة يومياً ع النازحين. 

لبنان شهد زيادة بحالات النزوح بسبب الحرب ووصلت الأعداد لأكتر من مليون نازح، والعديد من العيل عم تكافح لتلبية حاجاتها الأساسية. هيدي المبادرة بتهدف لتوفير لقمة أكل بالإضافة لخلق شعور الانتماء لكل اللي عايشين صعوبات كبيرة.

هالمجهود الجماعي بيأكد على أهمية التضامن بوقت الأزمة، وبجيب البسمة على وجوه واجهت صعوبات. هاللفتة بتعكس روح المجتمع والإنسانية اللي بتجمعنا كلنا كلبنانية.

بتلاقوا فرن غطاس بالحازمية جنب المجلس الشيعي الأعلى.

شوفوا كمان، قصف أجمل بيت تاريخي بالنبطية، هيك صار!