من يوميات الضاحية، ١٠ شغلات منحبّها واشتقنالها!

ضاحيتنا الحلوة عم تتعرض للدمار و الإعتداءات الهمجية المستمرة، وأغلبية ناسها انجبروا يتركوا بيوتن. ومع تزايد الصعوبات، حبينا نرجع نتذكّر اليوم قلب وروح الضاحية الحبيبة يلي كانت دايمًا مليانة حياة وعجقة وبساطة وفرح، من أماكن مميزة وأكلات بتشهي والناس الطيبة. لهيك قررنا نتذكر مع بعض يومياتنا كلنا بقلب الضاحية، الشغلات اللي منحبّها فيها و إشتقنالها!

١. نشتري كل كتبنا المفضلة من فيلوسوفيا بحارة حريك

كل عاشق كتب بيعرف هالمكتبة المشهورة بحارة حريك. من الكلاسيكيات لآخر ترندات BookTok، “فلسوفيا” فيها كل شي وبأفضل الأسعار!

٢. ندوق كرواسون الشاورما عند كرواسون الضحى بالليلكي

هيدا المحل انشهر بكرواسون الشاورما وشو ما كان رأيكن بهيدا الإختراع إذا حبيتوا أو لاء، “كرواسون الضحى” من الأماكن المميزة بالضاحية.

٣ الوقفة والنطرة على الحاجز بأضيق محل بالضاحية

والله اشتقنا حتى لعجقة الحواجز. إن شاء الله منرجع منعيش هيدي اللحظات قريبًا.

٤. ونعلق بعجقة السير بفترة عيد الميلاد (بعدنا مش فاهمين ليه هلقد بتكون عاجقة بالضاحية)

العجقة بقلب الضاحية بوقت عيد الميلاد بتخليكن تتساءلو شو عم بصير بالضاحية؟ برج البراجنة هيي أكتر منطقة بكون فيها عجقة بلبنان بفترة العيد.

٥. ناكل أطيب سندويش قريدس من Cloudy Bites بالمعمورة

قبل ما يفتح كلاودي بايتس ببدارو، كانوا الكل يزور المعمورة بالضاحية كرمال يجربوا سندويشاتو هونيك!

٦. ناكل عند “الجواد” و “الأغا” أكتر ما ناكل بالبيت

كنا نروح كرمال الأكلات الطيبة ونلتقى بنص الضاحية هونيك! كتير إشتقنا لهيدي المحلات المحبوبة ولقمتها الطيبة

٧. نقضي نهارنا مع الأصحاب بGame Lab ببير العبد

في حدا ما بيحب يلعب FIFA ما راح لهونيك؟

٨. نجيب أطيب الأكلات الدسمة من Mr. TRUCK بحارة حريك وبرج البراجنة

لما كان يخطر عبالنا شي دسم وقوي، ما فيه غير Mr. TRUCK. فرايز مع لحمة، برغر بالصوص، ومعكرونة مليانة جبنة… عندن كل شي بشهي.

٩. ننطر بالصف كل النهار لنقدر نجيب “الداعوقية” المشهورة من حلويات الداعوق بحارة حريك

ما فينا نعمل ليستة عن الإشيا يلي منحبها بالضاحية من دون ما نذكر “الداعوقية” الشهيرة!

١٠. نشرب كوكتيل مع كريب من عصير حنين ببرج البراجنة

من الكوكتيل للكريب اللي بتشهي، “عصير حنين” كان مقصدنا المفضل للحلو. صح منحب كوكتيل الفواكة اللي بيعملوا، بس هني أكتر شي معروفين بالكريب! مغطاية بكل شي طيب، من أوريو، بسكويت اللوتس، وشوية صوص شوكولا.

خبرونا، إنتو لشو إشتقتوا بالضاحية؟

شوفوا كمان، خبرية حلوة، زيتون ديرميماس ما تأثر بالفوسفور!