بالفيديو: زفة عروس بمركز نزوح ببعقلين

إنتشر فيديو مؤثر على مواقع التواصل عن عرسان نازحين بلبنان إحتفلوا بزواجن من خلال زفة لبنانية من قلب ثانوية بعقلين الرسمية، اللي حالياً هي مركز نزوح وإيواء لآلاف النازحين من الجنوب.

زفة بسيطة بمركز نزوح وبحضور عيلة العروس مع شوية تصفيق و توزيع بسكويت، هيك كانت الأجواء! الخبرية طلعت إنو العريس مسافر والعروس كانت بدها تسافر لعندو خلال هاليومين. أهلها حبّوا يزفّوا بنتن قبل ما تفلّ، ولو شي بسيط ليخففوا عن حالن حزن بغياب مراسيم العرس اللي إنحرموا منّها بسبب الظروف الحالية. 

هالزفة الحلوة خلقت جو من الفرح والدفا بالرغم من مآسي الحرب. هيدول العرسان متلن متل كتار من العرسان اللي كانوا مخططين ومجهزين لعرسن وفرحتن قبل شهور من إنو تندلع الحرب.  

مبروك للعرسان، وع أمل يعملوا أحلى عرس بالجنوب أوّل ما تخلص الحرب!

مش أوّل مرة منشهد قصص فيها أمل وحياة من مراكز الإيواء! شوفوا كمان، كلارا، أول طفلة ولدت بمركز نزوح.