بعد إهانة جمالها… ندى كوسا استرجعت حق لبنان بمسابقة ملكة جمال الكون

ندى كوسا، ملكة جمال لبنان 2024، كانت محضرة تروح تمثل بلدها بمسابقة ملكة جمال الكون بالمكسيك، بس بدل ما تكون التجربة كلها حماس وفخر، صار في موقف مؤسف وغير متوقع خلتها تفكر تلغي مشاركتها.

نشر حساب Miss Universe فيديو لشخصين من منظمي المسابقة عم يقارنوا جمال ملكتين: ملكة الفلبين وملكة جمال لبنان. بالوقت اللي المنظمين عبّروا عن إعجابن بصورة ملكة جمال الفلبين، واجهت ندى كوسا إنتقاد لاذع وغير لبق لأنو ما عجبتن صورتها. هالكلام أزعج ندى، وكمان كل اللي بيحبوا وبيحترموا لبنان، خاصةً إنو هيدي تعتبر إهانة لمركز ملكة جمال بلد بأكملو مش ندى كوسا شخصياً.

قرار عدم المشاركة

بعد ما وصل الفيديو لندى، تحركت وزارة السياحة اللبنانية فوراً وبعتت كتاب لمنظمي المسابقة طالبين اعتذار علني وحذف الفيديو المهين. بالبداية، كان الرد بدون اعتذار صريح، وهون قررت ندى ما تشارك، مش بس دفاعًا عن حالها، بس كرامة للبنان ككل.

ومن بعد القرار بعدم المشاركة، بعتت المنظمة اعتذار رسمي وحذفت الفيديو. ومش بس هيك، وعدت ندى باستقبال خاص بالمكسيك واعتذار شخصي عند وصولها. من بعد هالاعتذار، قررت ندى ترجع تكمل مشوارها وتخلي صوت لبنان يوصل للعالم.

ندى: رسالتي السلام!

ملكة جمال لبنان كانت بحالة ضياع إذا بتشارك بالمسابقة بسبب الحرب الحالية بلبنان. من قبل كانت رسالتها الصحة النفسية، ولكن بإختلاف الظروف، اختلفت رسالتها.

بتقول ندى بمقابلتها ع LBCI: “رسالتي إني روح ع المسارح الدولية وخبّر إنو نحنا عم بيصر عنا حرب… بدي وصّل رسالة إنو نحنا شعبنا عم يتعذب وعم ينزح. نحن الجيل الجديد بدنا سلام، وما بدنا اسم لبنان يرتبط بالحرب. بدنا لبنان يرتبط اسمو بكل شي حلو متل ما عرفناه دايماً.” ندى مش بس رايحة تمثل الجمال، بل رايحة تحمل رسالة عن الحرب والسلام، وشهادة وطن مجروحة بالوجع والتحدي والصمود.

حقائق عن ندى كوسا

غير هيك، وج ندى كوسا ممكن يكون مألوف للبعض، لأنها شاركت بعدد من الدعايات لأبرز دور المجوهرات الفاخرة بلبنان. وكمان طلت بفيديوهات توعية لمؤسسات اجتماعيّة عن قضايا مجتمعية، يلي بينو عن موهبتها بالتمثيل. من هواياتها السفر، واللي دايمًا عم توثقو عبر صور على إنستغرام عن معالم وأماكن زارتها بمختلف بلدان العالم.

عبالكن تتعرفوا أكتر على شخصية ندى؟ تصفحوا هالمقال: تعرفوا على ندى كوسا: ملكة جمال لبنان 2024