بالفيديو: بياع ورد يزرع الجمال وسط دمار الضاحية

انتشر فيديو بياع ورد وهو عم يحضّر بوكيهات ورود وسط الدمار بقلب الضاحية الجنوبية لبيروت. هو محل الورد Planto ببيروت، وصاحبه قرر يصنع جمال بزمن الحرب ويشارك هيدي الصورة عن لبنان لكل العالم. 

 بالفيديو، منشوف بياع ورد بيزور الضاحية، وبيصوّر هو وعم يرتب بوكيات ملونة على لوح خشب جنب محلو يلي تضرر من القصف، محاوط بالردم والمباني المدمرة والغبرة القوية . الضاحية تأثرت مؤخرًا بالقصف العنيف، ولكن بياع الورد عم ياخد لحظات ليصنع جمال على مشهد من الدمار الهائل. 

رغم كل التحديات والصعوبات يلي عم يمرق فيها البلد، إلا إنو الشعب اللبناني دايماً بيعرف يعبر عن حبّه للحياة. هالشاب بيعكس الروح اللبنانية: صمود، إبداع، وفن، حتى بأصعب الظروف. وع فكرة، رغم كل شي الشاب شغلو بعدو مكفي!

بمنشور لطيف، شاركنا صاحب Planto لوحة فنية للفنانة هدى وصوّرها مع حجم الدمار الهائل ليوصّل رسالة لكل العالم. كتب بالكابشن: “نحنا أكتر ناس منحب الفن و الحياة، و منصنعها بكل أشكالها و ألوانها بأصعب الظروف و أفضلها، دايماً مبدعين غير انهزاميين، ولا نعرف المستحيل… أنا حالة من ألوف الحالات الموجودة بالضاحية الجنوبية بلبنان… صورت هالصورة اليوم، و ح نرجع نصوّرها بنفس المكان بيوم من الايام، مش مطوّل هاليوم ان شاء”. 

بمنطقة شهدت كتير من الوجع والمآسي ، هيدي اللحظات البسيطة تذكّرنا بأنو رغم كل شيء، اللبنانيين دايماً بيلاقوا طريقة ليعيشوا، يفرحوا، ويتمسكوا بالجمال حتى وسط الدمار.

ما تنسوا تدعموا Planto على حسابه هون.

 شوفوا كمان، شاب يعزف البيانو وسط الركام والدمار بالضاحية