كافيه مهضوم فتح بمعمل الحرير الأثري بضيعة القبيات

الشي الوحيد يلي ما بيتغير بلبنان هو حب القهوة والمشاوير الحلوة. كرمال هيك حتى بظل الوضع يلي عم نعيشوا، بيضل في مشاريع جديدة عم تفتح ولازم ندعمها.

وصراحة ما في أحلى من مشوار بالقبيات، ضيعة بتاخد العقل بمناظرها الخلابة وتاريخها. وإذا بعد ما زرتوها، صار الوقت تكتشفوا كافيه جديد عم يضيف سحره على هالمنطقة: قهوة الحرير.

هالكافيه مش بس مكان تشربوا في قهوة، هوي قصة، هوي رحلة بالزمن. قهوة الحرير فاتحة بقلب معمل الحرير الأثري، مطرح يلي من زمان ولاد الضيعة كانوا يصنعوا فيه أجود أنواع الحرير ويبعتوا على إيطاليا. اليوم، نفس الحيطان الحجر يلي شافت تاريخ طويل عم تستقبلكن لتقدملكن أحلى قعدة وأطيب فنجان.

تخايلوا القعدة حد النار، صوت الحطب عم يطقطق وريحة القهوة الطازة معبية المكان.

أو برا، وسط القصر الحجر وبين هدوء القبيات، تحسوا كأنكن رجعتوا لزمن البساطة. هون القعدة عنجد بتخطفكن، بتشيل عنكن تعب الأيام وبتريح القلب.

إذا كنتوا من عشاق القهوة، رح تلاقوا عندن كل شي ممكن تتمنوا. من إسبرسو ناعم، للقهوة الكريمية، وحتى القهوة اللبنانية يلي بتنصب من الركوة دغري على الفنجان. أما لمحبي الحلو، عندن مخبوزات طازة بتطلع من الفرن سخنة على رفوفن: كرواسون، كوكيز وكيكات ولا أطيب وكمان عندن تيراميسو وقطع حلو وجميع أنواع المشروبات.

القعدة مش بس للقهوة والأكل، هيي لتغيير الجو عن جد. إذا كنتوا مع حدا بتحبوا، أو لحالكن مع كتاب، أو حتى مع الأصحاب، قهوة الحرير بتجمعكن عجو من الراحة والدفا. كل زاوية بهالمكان بتحكيلكن قصة، والحيطان الحجر بتحسسكن بجمال الماضي يلي بعدو عايش فينا لليوم.

إذا بدكن مكان مميز وساحر، مطرح بيروّق الأعصاب وبيجمع بين جمال القبيات وطيبة الضيافة اللبنانية، ما إلكن إلا قهوة الحرير. جربوها، وخلوها جزء من ذكرياتكن.

العنوان: القبيات، معمل الحرير
الرقم: 113 651 03

عجبكن هالمقال عن قهوة الحرير بالقبيات؟ شوفوا كمان، مشوار على ضيعة القبيات: ٢٤ شغلة تعملوها بهالمنطقة