مطعم لبناني بفرنسا بعيّشنا ذكرياتنا مع البونجوس

بتذكروا لمّا كنا نشرب بونجوس ومن بعدها نفقعها؟ البونجوس بشكلو المثلث المعروف ونكهتو الحامضة المنعشة، كان جزء من كل صيفية لبنانية، وبيذكّرنا بأيام اللعب والبساطة. بلفتة مليانة نوستالجيا، مطعم لبناني بفرنسا رجّع تقليد كتير بيذكّرنا بأيام الطفولة! 

مطعم Becky’s اللبناني بباريس مشهور بتقديم مناقيش ع اللبناني وتجربة خاصة لمحبي البونجوس. من بعد ما تدوقوا عندن منقوشة زعتر سخنة وتشربوا عليها بونجوس هرم، بتضهروا لبرا وبتفقعوا البونجوس مع أصحابكن. 

هالمطعم بيقدم الأكل اللبناني بطريقة بتعيّش الزبونات ذكرياتن الحلوة بلبنان. 

الناس كتير حبّوا الفكرة. الزباين، إن كانوا لبنانيين أو أجانب، صاروا يشاركوا فيديوهاتن على السوشيال ميديا هني وعم يفقعوا بونجوس. 

المطعم عم يقدم للناس مش بس نكهة لبنان، بس لحظة من كتاب الذكريات. وبهيك، بيثبت إنو أبسط الشغلات هي اللي بتترك أثر كبير.

شوفوا كمان، رغم الألزهايمر، تيتا لبنانية تذكرت غنية فيروز!