حزروا شو؟ “عيلة ع فرد ميلة” راجع بموسم جديد!

هالخبرية رح تفرح كتير ناس! فادي شربل أعلن بنفسو عن موسم جديد من “عيلة ع فرد ميلة” خلال مقابلة على Stardom On. وهيدا الإعلان رجع الذكريات الحلوة لكل يلي بيحبوا هالمسلسل اللبناني يلي صار جزء من طفولتنا.

هالمسلسل بيحكي عن يوميات رجال عم يتعلم كيف يتعامل مع مرتو المتطلبة، الولاد، والجيران وأهمن”وجيه” بطريقة مهضومة. وهو تكملة لمسلسل “مرتي وإنا”، يلي قدم أشهر الشخصيات الكوميدية اللبنانية بالألفية: فادي وكارين.

فادي وكارين رزق الله، هالثنائي الرائع، راجعين ليكملوا مغامرات العيلة يلي بتحسسنا كأننا قاعدين معن بالبيت. بس المفاجأة هي إنو الموسم الجديد مش بس تكملة للأجزاء القديمة، بل رح يكون بحلة جديدة ومواضيع مختلفة.

حسب مصادر “هواكم”، المفاوضات عم تصير مع شركة إنتاج ضخمة لتنفيذ الموسم الجديد، مع نفس فريق التمثيل يلي حبيناهن من كل قلبنا وأكيد وجوه جديدة. يعني فادي وكارين مش بس عم يكتبوا، كمان رح يكونوا نجوم القصة، وهالشي بيأكد إنه روح “عيلة ع فرد ميلة” رح تبقى موجودة.

أما عن أي محطة تلفزيونية رح تعرض هالموسم؟

لهلق ما في جواب أكيد. الموضوع مرتبط بالمفاوضات وباستقرار الأوضاع بالبلد. بس الجمهور واضح إنو مستعد ينتظر ليشوف هالعيلة المحبوبة راجعة تضحكنا وتذكرنا بطفولتنا بنفس الوقت.

شاركونا ذكرياتكن مع “عيلة ع فرد ميلة” ومين أكتر شخصية بتحبوها!

شوفوا كمان، حزروا شو؟ جورج خباز أعلن عن موسم جديد من عبدو وعبدو