شفة: كافيه بإطلالة بيروت… قهوة، حكايات، وقعدة غير شكل

بقلب بيروت، مطرح جديد فتح بوابو ليخلقلكن تجربة ولا أروع. هالمحل إسمو شفة، مش مجرد كافيه عادي… هوي تجربة ما بتشبه غيرها، بيجمع بين الطعمة، الجو، الموقع اللي بيخطف الأنفاس والتفاصيل اللي بتخلي كل زيارة عندن متل رحلة زغيرة بحد ذاتها.

عند شفة…فيكن تطبعوا ع قهوتكن!

هون القهوة إلها قصة، بتطلبها وبيطبعولك عليها يلي بدك ياه، إسمك، صورة بتحبها، أو حتى أرزة لبنان أو حيلا شي تاني. بتحسوا كل فنجان معمول كرمالكن. والأحلى؟ الخدمة مجانية! الفكرة إنو يكون هالشي جزء من تجربتكن وتعيشوا لحظة خاصة مع كل شفة قهوة.

القعدة؟ القعدة مش عادية. إذا بتقعدوا جوا، بتحسوا حالكن كأنكن ببيت بيروتي دافي وحنون. وإذا برا، القعدة بتطل ع آثار المدينة القديمة اللي بتحكي تاريخ بيروت بكل زاوية. بتشوفوا آثار بيروت العريقة وبتحسوا بروح المدينة اللي ما بتموت. الأجواء بتخليكن تحكوا قصص وتضحكوا مع أصحابكن بلا ما تحسوا بالوقت: دفا، صوت الضحكات، ريحة القهوة وحكايات الناس حواليكن.

شو بدكن أكتر من هيك؟ القهوة عندن قصة بحد ذاتها، ركوة وشفة قهوة وقطعة بسكوت. بس مين قال إنو القهوة بس لازم تكون كلاسيكية؟ عند شفة، القهوة رحلة بحد ذاتها. جربوا الـ بيستاتشيو لاتي، نكهة بتفاجئكن بقديشها مميزة. أو إذا بتحبوا شي دافي وساحر، ما في أطيب من الـ كريم برولي لاتي. أما إذا مزاجكن على شي غير، العصير عندن غير شكل، خصوصي الليموناضة بالحبق والليموناضة بالفريز.

أما الحلو، فهيدا موضوع تاني! الهوت تشوكليت مع مارشمالو لازم تطلبوا إذا كنتو بردانين لتدفوا قلبكن. وعندكن الـ براوني كب شي روعة، أو قطعة كوكيز شغل المحل اللي بتغمسوها بالـ سينامون لاتي، تجربة مستحيل تنسوها. والـ شيرد بوكس؟ أكتر شي رح تحبوا عند شفة، مليان براوني، ميني بانكيكس، وافلز، مارشمالو، وصوصات شوكولا سخنة وبتدوب بالتم. كل قطعة فيها طعمة مختلفة عن التانية.

مش بس حلويات، عندن كمان أكل خفيف طيب كتير. السندويشات؟ بتشهي وبيعملولكن ياها بخبز أسمر. إذا عبالكن شي أخف، الكروسان ع زعتر وجبنة ولوز، والسلطات كلها بتشهي. والـ أفوغاتو؟ كوب إسبرسو بيدوب فوق الآيس كريم، متعة حقيقية بكل ملعقة.

شو طعمة بيروت؟ بتلاقوها بفنجان بـ شفة

شفة مش بس كافيه. هوي مطرح بتلاقوا فيه حالكن إذا كنت جايين تنعزلوا شوي مع كتاب، أو تجتمعوا مع أصحابكن القراب على ضحكة وقعدة أو تبلشوا نهاركن مع حبيبكن. هوي مكان في زعل بيروت وفرحتها، مكان بتحسوا إنو كل زاوية منو معمولة لتكون جزء من ذكرياتكن.

شفة، مطرح ما بيروت بتكون موجودة، بكل تفاصيلها وحنيتها. محل بيجمع كل شي بتحبو: الماضي والحاضر، الجلسة المريحة والموقع الروعة حد أثارات بيروت.

شو ناطرين؟ جربوا، وخبرونا شو أول شغلة بتحبو تطلبوها. يمكن تكون بداية قصة جديدة.

العنوان: وسط بيروت
الرقم: 677 956 81

شوفوا كمان، أحلى ١٤ محل تجربوهن برات بيروت!