فلافل أبو نبيل: نكهة عمرها 60 سنة من تراث بيروت!

إذا بتحبوا الفلافل، فلافل أبو نبيل هوي وجهتكن الأولى ببيروت. هالمحل مش بس مطعم، هوي جزء من روح بيروت وتاريخها. ريحة الفلافل الطازة والطرطور بتسبقكن بشارع عائشة بكار، وبتاخدكن لزمن بيروت أيام البساطة. المحل اللي بلش ككوخ زغير سنة 1958 صار اليوم محطة للذكريات والنكهة اللي ما بتتغير.

بالخمسينات، كان عمو أبو نبيل يوقف ورا الشباك، يلف سندويشات سخنة لطلاب مدرسة الرمل الظريف وللبيارتة يلي قاطعين بالشارع. السندويش كان مزيج من الطعم البيروتي الأصيل: قرص فلافل طازة، طرطور شغل بيت، خضرا مقطوفة بنفس اليوم، ولفت وكبيس مقرمش. الوصفة بعدها نفسها من أكتر من 60 سنة، وطعمة الفلافل بعدها بتحكي عن بيروت القديمة.

ورت الحج سنة 1975 المصلحة عن بيو وهالمحل مشهور بنضافتو وبريحة الفلافل اللي بتشدكن علي أول ما تفوتوا عالمحل. ريحة بتذكركن بالطفولة، طعمة بتحكي عن أجيال كبرت وتربّت ع هالسندويشات. مش بس أهل المنطقة بيجوا، الكل صار يقصد هالمحل لأنه أكتر من محل فلافل، هوي محطة لاسترجاع ذكريات الزمن الجميل.

إذا بتحبوا تاكلوا على مهلكن، جرّبوا الفلافل بالصحن، مع طرطور، خضرا، وقراص فلافل طالعة من الزيت الذهبي. المحل ما بيقدم بس أكلة، بيقدم تجربة بتعيشكن إحساس بيروت القديمة، كيف الناس كانوا يعيشوا ببساطة وطيبة.

فلافل أبو نبيل موجود بشارع عائشة بكار، حد دار الفتوى. إذا عبالكن طعمة بيروت القديمة اللي ما بتنسيها الأجيال، المحل بعدو فاتح بوابو كل يوم وناطركن!

العنوان: بيروت، عائشة بكار، شارع دار الفتوى
الرقم: 331 530 03

شوفوا كمان، مانو: محل الشاورما المفضل عندكن وصل من برج حمود على خلدة