تجربة عشا سرية بقلب مطحنة عمرها 300 سنة!

إذا عبالكن عشا غير شكل، بعيد عن جو المطاعم التقليدية، فلازم تزوروا “The Old Mill“. هالمكان مش متل غيرو، لأنو أول ما تفوتوا بتحسوا حالكن كأنكن ضيوف عند الشيف مش زبونات بمطعم. والأحلى إنو المطعم موجود بمطحنة قديمة عمرها 300 سنة بالحازمية، شي بيعطيه هيبة وطابع خاص بيخليكن تعيشوا التجربة بكل حواسكن.

هون ما في منيو تختاروا منو، وما في طلبات. كل القصة ببلشها الشيف بسؤالين: عندكن حساسية على شي؟ وبتاكلوا لحمة؟ وبعدها، ببلش يحضرلكن المفاجآت! ستة أطباق من ابتكارو، كل وحدة أغرب من التانية وأطيب من اللي قبلها. التجربة مش بس طعمة، هي متعة من أول لقمة لآخر لقمة.

كل شي هون معمول بديات الشيف، والأكل في لمسة فن وإبداع. جربوا شوربة الفستق، ستيك تارتار مع بوظة ديجون، وحلويات فرنسية متل الموس شوكولا وغيرها. يعني تجربة بكل معنى الكلمة، كل لقمة بتحسوها معمولة بحب وشغف.

الأجواء لحالها قصة تانية. الضو خفيف، الديكور بسيط بس دافي، وكل تفصيل بالمكان بيعطيكن إحساس إنكن ببيت لبناني قديم بس مع لمسة راقية. بتحسوا حالكن مسافرين على نص باريس.

هيدا مش مطعم عادي، وهيدا اللي بيخلي تجربة ما بتنتسى. كل زيارة مختلفة، كل مرة في أطباق جديدة، والشيف عطول بيجرب قصص جديدة. بتحسوا حالكن قاعدين بقلب مطعم سري بشوارع باريس وعم تاكلوا أكل معمول بحب، مش بمطعم عادي.

إذا عبالكن شي جديد، تجربة رايقة، وعشا رومانسي ما بينتسى، “The Old Mill” هوي عنوانكن. بس ما تنسىوا، لازم تحجزوا قبل بنهار، لأنو القعدة هون للي بيعرف قيمة الأكل عنجد!

العنوان: الحازمية
الرقم: 550 065 71

شوفوا كمان، تعرفوا على هالمطعم الفرنسي ببرمانا يلي عمرو أكتر من 50 سنة.