مدربة رياضية لبنانية عمرها 89 سنة… تخايلوا!

إذا بتفكروا إنو العمر بيوقف حدا عن تحقيق أحلامو، رح نعرفكن ع ست يلي كسرت كل القواعد! ناهدة عابدين، 89 سنة وبعدها بتدرب بالنادي كأنها بعمر العشرين، وبتتمرن كل يوم بين 3 ل 4 ساعات بلا ملل ولا تعب. بالنسبة لإلها، العمر مجرد رقم، والإرادة أقوى من أي عذر!

قصتها ما بلشت بالرياضة، بل بالعكس! لما كانت بعمر ال 50، واجهت مشكلة صحية كبيرة. كان عندها خيارين: يا تستسلم للمرض، يا بتحاربو! فاختارت تحاربو، وقررت إنو الحل الوحيد هوي الحركة، النشاط، والرياضة. ومن هونيك، بلشت قصتها مع السبور!

مارست رياضة الكاراتيه، وتمرنت لحد ما أخدت الحزام الأسود! وما اكتفت هون، جربت كل أنواع الرياضة: لعبت تنس، رفعت أوزان، وضلت كل يوم تتحدى حالها أكتر. الرياضة ما صارت بس هواية، صارت أسلوب حياة.

طلعت مع مالك مكتبي من كم سنة، وحكت عن تجربتها اللي ألهمت كتير ناس. وقالتها بصوت واضح: “العمر مجرد رقم!” ولا مرة حست حالها كبرت، ولا مرة سمحت للتعب يوقفها، لأن بالنسبة لإلها، الرياضة بتخلق الإنسان من جديد.

إذا بعدكن بتقولوا “ما عندي وقت”، أو “ما بقدر بلّش”، تذكروا ناهدة! 89 سنة وبعدها كل يوم عم تعمل المستحيل. ما في شي بيوقفها… والسؤال هلق: إنتو شو ناطرين؟

شوفوا كمان، وين بتلاقوا تاني أعلى كنيسة بلبنان؟