ترند “هاش هاش” بعدو مكمل… وهالمرة على المسرح!

إذا كنتو من متابعين السوشال ميديا، أكيد مرق عليكن ترند “هاش هاش” يلي اكتسح السوشال ميديا وقلب الدني فوقاني تحتاني. “قالتلي هاش هاش قلتلها مين هاش هاش؟ حطتلي زرافة. ليه شو بها الزرافة؟ حلوة الزرافة وطويلة وبخافوا منا تلات ترباع الحيوانات”. كلنا ضحكنا، كلنا رددناها، وصارت “هاش هاش” كلمة بتنقال بلا سبب! بس مين كان بيتوقع إنو هيدا الترند يتحول لحدث كوميدي من العيار التقيل؟

شركة Wave Production قررت تاخد هيدا ترند لمحل جديد وتعمل أكبر حفلة كوميدية بـ2025 بعنوان “مين هاش هاش؟”. مش حيلا حفلة، هيدي السهرة رح تكون كلها ضحك، مفاجآت، ووجوه كوميدية من الصف الأول بلبنان!

الجمعة 25 نيسان، ملعب الأنطونية كسارا بزحلة رح يتحول لساحة ضحك ونكت. الجمهور جاهز؟ النجوم مستعدين؟ الأجواء؟ ولعانة أكيد! باسم فغالي، نادي أبو شبكة، طوني أبو جودة، أريج الحاج، وعماد مسعد رح يكونوا على المسرح، بس هون المفاجأة الكبيرة: في كوميديين سريين ما حدا بيعرف مين هني رح يولعوا المسرح! مين أولكن يا ترى؟

ما في خطوط حمرا، ما في مواضيع ممنوعة. كل شي مسموح، وكل شي ممكن ينقال! يعني إذا مفكرين حالكن جايين تحضروا عرض كوميدي عادي، فكروا مرتين!

المقاعد رح تكون مليانة، والناس رح تحضر بأعداد كبيرة، فحجزوا بطاقتك من هلق قبل ما يروحوا.

فجمعوا أصحابكن، وحضروا حالكن للضحك يلي ما بيوقف، لأنو الجمعة 25 نيسان، كل الجمهور رح يكون بحالة “هاش هاش” عنجد ويستستمع بالعرض!

شوفوا كمان، بتعرفوا إنو أكبر منتجع تزلج بالشرق الأوسط موجود بلبنان؟