وينن: التطبيق يلي بيختصر وقتك… وبيعرف وين أصحابك!

قدي بتصير القعدة أسهل لما ما نضطر نفتح الواتساب ونسأل كل حدا من أصحابنا يلي منضهر معن: “وينكن؟” وما حدا يرد علينا أو يتأخروا ليردو؟

هلق صار في حل لخبرية حالة الاختفاء الجماعي! “وينن” تطبيق جديد ومهضوم، بفكر عنا وبخبرنا كلّ شي بلا ما نتعذب. ما عاد في داعي نبعت مسجات، ننطر، ونتحمل تقل دم أصحابنا يلي دايماً بيردو بعد 8 ساعات. القصة صارت أبسط بكتير، ووقتنا ما عاد يروح عالفاضي.

كيف بيشتغل تطبيق “وينن”؟

الخبرية سهلة كتير. هيدا التطبيق بخلينا نعرف أصحابنا وينن بلا ما ننزعج ونزعجن. كلّ اللي علينا نعملو هو إننا ننزّلو نحنا ورفقاتنا يلي منضهر معن، وكل ما حدا ضهر بيحط هوي وين، لأي ساعة باقي، ومين في يشوف موقعو. هيك كل حدا بيعرف وين التاني، واللي عبالو يلحق بيلحق بلا حجج بلا طعمة “كنت نايم، ما شفت المسج”.

بلا عجقة التلفونات

كم مرة كنا نعصب لأننا ما عرفنا أصحابنا وين وشفناهن مع بعض وما قالولنا؟ أو كنا ناطرين حدن وما إجى، وبالآخر بنكتشف إنو نسي وراح ع مطرح تاني؟ “وينن” حل القصة، بلا وجعة راس. ما بقا في داعي نسأل مليون مرة ونسمع الحجج التقليدية وهيك بتعرفوا مين أصحابكن الحقيقيين كمان. التطبيق بخبركن كل شي دغري، وإنتو عليكن تقرروا وين تروحوا ومع مين وشو تعملو.

يعني مش رح نسمع بعد اليوم: “بكرا بخبركن”، “مش عارف حالي وين”، و”بعتذر لغيت آخر لحظة”. كلن صاروا من الماضي، كل أصحابكن صاروا تحت المراقبة (بس بطريقة حلوة).

التطبيق مش بس لحتى تعرفوا أصحابكن وين، كمان ليخليكن تلحقوهن بسهولة، وتختصرو وقت وضياع عحالكن. ابعتوا لأصحابكن هلق، حملو، جربو، وخلو حياتكن تصير أبسط وأسرع. وفيكن كمان تجربوا مع الشريك وهيك بتعرفوا كل تحركاتو من دون ما تحكو.

كلنا عننا أصحاب بيغيبوا وبيضهروا وقت بدن. بس مع “وينن“، صار فينا نعرف كل شي عنن بلا ما نتعب. فكرة عفوية، مهضومة، ومش رح تندمو عليها!

نزلوا “وينن” وخلي القعدة تصير أسهل وأحلى. وإذا بدكن تعرفوا أكتر عن التطبيق، فوتوا على إنستاغرام تبعن وشوفوا كل التفاصيل.

شوفوا كمان، ترند “هاش هاش” بعدو مكمل… وهالمرة على المسرح!