مريم عزمت عمو التاكسي عالإفطار… والناس تأثرت بالقصة!

اليوم حبينا نشاركن قصة لطيفة شفناها ع تيك توك لموقف مرق مع شابة لبنانية اسمها مريم مغنية. بتخبرنا مريم بالفيديو كيف طلعت مع سواق تاكسي كبير بالعمر، لتعرف منو إنو بيفطر لحالو برمضان، ومن هون قررت تعمل شي بسيط بس مؤثر مع عمو التاكسي. 

“شو رأيك تفطر معي؟” وهيك عزمتو مريم ل عمو التاكسي ع مطعم بالحمرا وعمو قبل عزيمتها. بيخبرها إنو مرتو متوفية من سنة، وما عندو ولاد كرمال هيك بيفطر لوحدو خلال رمضان. 

بتشوفوا بالفيديو، مريم وعمو التاكسي عم يجربوا الأكل سوا من فتوش وشوربة وشاورما ويعطوا رأين. الفيديو حصد آلاف المشاهدات والتعليقات الإيجابية يلي عم تدعم مريم وتشكرها ع هيك خطوة.

رمضان هو شهر الخير والعطاء، وهيك مواقف بسيطة بتعمل فرق كبير بحياة الناس. كل واحد منا بيقدر يقدم شي إنساني برمضان، سواء بعزيمة، بكلمة حلوة، أو بلحظة ونسة لشخص ممكن بيحسّ بالوحدة. هالشي، بيخلّي رمضان أدفى وأجمل ع الكل.

ما تنسوا تدعموا مريم هون، بتنزل كتير مشاوير ع مطاعم وتجارب أكل!

شوفوا كمان، شو جديد؟ أجمل كافيه رح يسرق قلبكن ببيروت!